منگلورو:10/اکتوبر(ایس اؤ نیوز) ’’ھو اجتبٰکم‘‘ ہر فرد ہے ملت کے مقد ر کا ستارہ کے مرکزی عنوان کے تحت اسٹوڈنٹس اسلامک آرگنائزیشن آف انڈیا کرناٹکا (ایس آئی اؤ)کی طرف سے رائچور میں 19،20،21اکتوبر کو سہ روزہ ریاستی کیڈر کنوینشن  منعقد کیا جارہاہے۔ کنوینشن کا پیغام ریاست کے تمام شہریوں تک پہنچانے ’’بصیر ت افروز کل کے لئے ‘‘ عنوان کے تحت بیدر اور منگلورو سے دو کارواں نکالے گئےہیں۔

منگلورو میں ایس آئی اؤ کے سرپرست اطہر اللہ شریف نے کارواں کا افتتاح کیا۔ طلبا و طالبات پر مشتمل یہ جلوس جیوتی سرکل سے ڈی سی دفتر پہنچ کر جلسہ میں منتقل ہوا۔ جہاں اطہر اللہ شریف نے افتتاحی خطبہ دیتے ہوئے کہاکہ بصیرت حاصل کرنے کے لئے جاہلیت کا سامنا ہوگا، اس سلسلے میں ایس آئی اؤ نے  اعلیٰ مقصد لے کر کل کے لئے بصیرت کے تحت منعقد ہونے والا کنوینشن کامیاب ہونے کی دعا کی۔ انہوں نے کہاکہ معاشرے میں ایک گروہ برائی کو پھیلا تا رہتاہے  دوسرا گروپ خاموش تماشائی بنا رہتاہے، مگرتیسرا گروپ اپنی بھلائیوں سے برائیوں کا ازالہ کرنے کےلئے مسلسل کوشش میں مصروف رہتاہے۔ انہوں نے ایس آئی اؤ کے کیڈر سے کہاکہ وہ تیسرے گروہ کے نمائندے بنیں۔

ایس آئی اؤ کےصدر سید اظہرا لدین نے خطاب کرتے ہوئے کہاکہ کائنات کی تخلیق کے بعد اللہ تعالیٰ نے انسان کو اشرف المخلوقات بنا کر پیدا کیا ہے۔ اور زندگی کےلئے ایک اعلیٰ مقصد بھی دیا ہے ہمیں اس کا شعور ہونا چاہئے۔ حالیہ دنوں میں ملک کے اندر ظلم واستحصال حد سے زیادہ بڑھ گیا ہے۔ مسلمانوں نے ملک کے لئے جو قربانیاں دی ہیں ان کو ملک کے شہریوں کے سامنے پیش کرنے  پر زور دیا۔ ہمیں  اللہ نے بہت بڑی ذمہ داری سونپی ہے۔ ہم انسانوں کو انسانیت کا درس دینا ہے جس کے لئے ہماری مسلسل کوشش جاری رہنی چاہئے۔ اس کے ساتھ ہم خود بھی اپنا احتساب کریں۔

شانتی پرکاشن کے مینجر محمد کوئیں نے اختتامی خطاب کرتے ہوئے کہاکہ  آج جاہلیت ہی اکثریت کا سرمایہ بن گئی ہے، شعور اور بصیرت کا سبق دینا ہماری اہم ذمہ داری ہے۔ ہمارا معاشرہ توہمات اور زعم کی دنیا میں چکر کاٹ رہاہے۔ ہمیں امید پر کام کرنا چاہئے ، معاشرے کو اعلیٰ مقام پر پہنچانے کے لئے ہمیں جدوجہد کرنی چاہئے۔ جلسہ کے دوران اُڈپی کے سویندنا کے فن کاروں نے امتیاز بیگ کی قیادت میں نکڑ ناٹک پیش کیا۔ کارواں کے ناظم سید زید نے افتتاحی کلمات پیش کئے تو دانش پانے منگلورو نے نظامت کرتے ہوئے شکریہ اداکیا۔ اس موقع پر جماعت اسلامی ہند کرناٹکا کے سکریٹری کے اشرف، ناظم ضلع امین احسن ، ایس آئی اؤ کے یاسین کوڈی بینگرے موجود تھے۔