سندھو کی شکست کے ساتھ ہی ایشیا چمپئن شپ میں ہندوستانی چیلنج ختم
نئی دہلی،29اپریل(ایس او نیوز؍آئی این ایس انڈیا)اولمپک سلور میڈلسٹ پی وی سندھو ایشیا بیڈمنٹن چیمپئن شپ سے باہر ہو گئی ہیں۔ سندھو کو سخت کوارٹر فائنل مقابلے میں چین کی آٹھویں وریا بگجاؤ نے ایک گھنٹہ اور 17 منٹ تک چلے مقابلے میں 21۔15، 14۔ 21، 22۔24 سے شکست دی۔سندھو کی شکست کے ساتھ ہی ٹورنامنٹ میں ہندوستان کی مہم بھی ختم ہو گئی ہے۔سندھو نے پہلے گیم میں 4۔4 کے اسکور کے بعد برتری بنائی اور پھر اسے قائم رکھتے ہوئے کھیل جیت لیا۔ دوسرے گیم میں سندھو ہمیشہ پچھڑی رہی۔ بگجیاو نے جلد ہی 13۔7 کی برتری بنائی۔ سندھو نے کچھ پوائنٹس اپنے نام کئے لیکن چین کی کھلاڑی نے کھیل جیت لیا۔تیسرے اور فیصلہ کن گیم میں سخت مقابلہ دیکھنے کو ملا۔ سندھو آغاز میں پچھڑی لیکن 16۔16 پر انہوں نے برابری حاصل کر لی۔ اس کے بعد اسکور 19۔19 ہوا۔ چین کی کھلاڑی نے میچ پوائنٹ حاصل کیا لیکن سندھو نے 20۔20 اور پھر اسکور 21۔21 کیا۔ سندھو نے 22۔21 پر میچ پوائنٹ حاصل کیا لیکن بگجیاو نے مسلسل تین پوائنٹس کے ساتھ میچ جیت لیا۔