بنگلور میں سلک بورڈ پر سگنل فری ریامپ کی تعمیر کا ٹنڈر منظور
بنگلورو، 10؍اپریل(ایس او نیوز) شہر میں ٹریفک کے مسئلے کو قابو میں کرنے کے لئے ایک مستقل پہل کے طور پر 123کروڑ روپیوں کی لاگت پر سلک بورڈ جنکشن کے قریب تعمیر کیا گیا پراجکٹ تیار ہوچکا ہے۔
بی ڈی اے اور بی بی ایم پی کے اشتراک سے سلک بورڈ جنکشن کے قریب 2.84کلومیٹر طویل لوپ اور ریامپ تیار کرنے کا منصوبہ بنایا گیا ہے۔ 27 مارچ کوبی ایم آر سی ایل نے اس کاٹنڈر منظور کیا تھا اور 27 ماہ میں اسے پورا کرنے کی ہدایت جاری کی تھی۔ سلک بورڈ کے اختتام سے لے کر یہ ریامپ شروع ہوگا اور مصروف ترین ٹریفک کے مقامات سے گاڑیوں کو گزرنے میں اس سے مدد ملے گی۔ جے دیوا اسمبلی کی طرف یہ ریامپ ختم ہوگا اور سلک بورڈ سے جئے دیوا اسپتال کی طرف آنے والی گاڑیاں اس ریامپ کا استعمال کرکے آسانی سے نکل سکیں گی۔ اس کے ساتھ ہی اوٹر رنگ روڈ سے جئے دیوا اسپتال کی طرف آنے والی گاڑیاں بھی اس ریامپ کی مدد سے ریلوے برڈج پار کرسکیں گی۔ میٹرو ریل پراجکٹ کے دوسرے مرحلے کی تعمیر کا سلسلہ جو ان دنوں اس علاقے میں جاری ہے ا س ہم آہنگ کرتے ہوئے یہ پراجکٹ 798کروڑ روپیوں کی لاگت پر بنایا جارہا ہے۔