ریزرویشن دینا آسان نہیں: دیوے گوڈا
بنگلورو،9/اکتوبر (ایس او نیوز) سابق وزیر اعظم وجے ڈی ایس کے سربراہ ایچ ڈی دیوے گوڈا نے آج کہاکہ وزیراعلیٰ سدارامیا ریزرویشن سے متعلق کچھ بھی بولتے رہتے ہیں۔ ریزرویشن کا اعلان کرنا اتنا آسان نہیں۔ سپریم کورٹ اس کی اجازت نہیں دے گا۔ یہاں منعقدہ ایک اخباری کانفرنس کو خطاب کرتے ہوئے انہوں نے بتایا کہ کمار سوامی کی خراب صحت کی وجہ سے پارٹی کی مکمل ذمہ داری وہ خود نبھارہے ہیں۔ پارٹی کے مختلف لیڈروں کو ریاستی سطح کی ذمہ داری دی گئی ہے۔ انہوں نے بتایا کہ ماہ نومبر میں اقلیتوں کی کانفرنس ایس سی اور ایس ٹی کانفرنس کے علاوہ کسانوں کی کانفرنس منعقد کی جائے گی۔ ماہ دسمبر کے اختتام تک تمام 224؍اسمبلی حلقوں میں جے ڈی ایس کو مزید طاقتور بنانے کام کرنے کے لئے انہوں نے پارٹی لیڈروں اور ورکرس کو ہدایت دی ہے۔ انہوں نے کہاکہ میں نے اس ریاست کے وزیراعلیٰ اور وزیراعظم کی حیثیت اورکمار سوامی کے دور ا قتدارمیں کی گئی کار کردگی اور مختلف عوام دوست اسکیموں سے متعلق عوام میں بیداری پیدا کرنے پارٹی لیڈروں کو ہدایت دی ہے۔ اس سلسلہ میں عوام سے رابطہ کرکے انہیں آگاہ کرنے ایک مہینہ کی مہلت دی گئی ہے۔ اس دوران مختلف حلقوں میں پارٹی امیدواروں کی بھی نشاندہی کی جائے گی۔ اسی بنیاد پر اگلے اسمبلی انتخابات میں پارٹی ٹکٹ دیا جائے گا۔