کاویری احتجاج ختم کرنے سدرامیا کی مادے گوڈا سے اپیل
بنگلورو24؍ستمبر(ایس او نیوز) کاویری طاس کے کسانوں کے فصلوں کو ہوئے نقصان کا سروے کرنے اور انہیں معاوضہ دینے کے سلسلے میں ریاستی کابینہ میں تبادلۂ خیال کے بعد فیصلہ لیا جائے گا۔ یہ بات آج وزیر اعلیٰ سدرامیا نے کہی۔ کاویری ہتا رکشنا سمیتی کے چیرمین ڈاکٹر جی مادے گوڈا کو اپنا احتجاج ختم کرنے کی اپیل کرتے ہوئے وزیراعلیٰ نے ان سے فون پر بات چیت کی اور کہاکہ ریاستی حکومت کاویری طاس کے کسانوں کو خسارہ میں مبتلا ہونے ہرگز نہیں دے گی، بلکہ فصلوں کو جو نقصان ہوا ہے پہلے ہی اس کی بھرپائی کرنے کا منصوبہ تیار کرلیاہے۔ انہوں نے کہاکہ کاویری میں پانی کی قلت کے سبب کسانوں کو جو خسارہ ہوا ہے اس کا جائزہ لینے کیلئے جلد ہی احکامات صادر کئے جائیں گے۔ احتجاجی قائدین کی مانگ کے مطابق ریاستی حکومت کی طرف سے کاویری سے تملناڈو کو پانی کی فراہمی کا سلسلہ بند کیاجاچکا ہے۔ انہوں نے کہاکہ مادے گوڈا کی قیادت میں فی الوقت جو احتجاج جاری ہے، اسے ختم کیاجائے ۔اس احتجاج کی وجہ سے عوام کو تکلیف ہوگی، منڈیا ضلع میں تعلیمی ادارے بند پڑے ہیں۔ فوری طور پر یہ احتجاج واپس لیا جائے۔