بنگلور،16؍فروری(ایس اونیوز) کرناٹک پردیش کانگریس کمیٹی کے کارگذار صدر دنیش گنڈو راؤ نے کہاکہ مرکزی حکومت محکمۂ انکم ٹیکس ، سی بی آئی ، انفورسمنٹ ڈائرکٹوریٹ اور دیگر ایجنسیوں کو استعمال کرکے ریاست میں سدرامیا حکومت کو کمزور کرنے کی مذموم کوششیں کررہی ہے۔ بیجاپور میں اخباری نمائندوں سے بات چیت کرتے ہوئے دنیش نے کہاکہ وزیراعظم نریندر مودی کو ملک کے جمہوری نظام پر بالکل یقین نہیں ہے۔ اسی لئے ہمیشہ سے وہ اپنے ماتحت تمام ایجنسیوں کا کھل کر غلط استعمال کررہے ہیں۔ مودی کے اقتدار پر آنے کے بعد سے اب تک ملک کے کسی بھی بی جے پی لیڈر کے دفتر یا گھر پر کوئی چھاپہ نہیں پڑا۔ جن ریاستوں میں کانگریس برسر اقتدار ہے وہاں کے کانگریس قائدین کو مسلسل نشانہ بنایا جارہا ہے، اس سے ظاہر ہوتا ہے کہ مرکزی ایجنسیوں کا استعمال کرکے بی جے پی ملک کو کانگریس سے پاک کرنے کا ایجنڈا پورا کرنا چاہتی ہے۔انہوں نے کہاکہ خود وزیراعلیٰ سدرامیا نے محکمۂ انکم ٹیکس کو مکتوب روانہ کرکے چھاپوں کی تفصیلات مہیا کرانے کا مطالبہ کیا ، لیکن ان ایجنسیوں نے یہ جواب دیا ہے کہ چھاپوں کی تفصیلات ریاستی حکومتوں کو نہیں دی جاسکتیں۔ جب یہ تفصیلات ریاستی حکومت کو وزیراعلیٰ کی درخواست پر بھی نہیں دی جاسکتی تو پھر انفورسمنٹ ڈائرکٹوریٹ ، انکم ٹیکس وغیرہ کی طرف سے ضبط شدہ دستاویزات یڈیورپا کے پاس کہاں سے آئے؟ ۔ سابق وزیراعلیٰ ایس ایم کرشنا کی طرف سے کانگریس چھوڑنے کے بعد کانگریس قیادت پر کی گئی نکتہ چینی اور ناانصافیوں کے الزامات کو مسترد کرتے ہوئے دنیش گنڈو راؤ نے کہاکہ عموماً کسی سیاسی رہنما کو اقتدار کے جتنے مواقع دئے جاسکتے ہیں اس سے کئی گنا بڑھ کر مواقع ایس ایم کرشنا کو کانگریس نے دئے، لیکن ایس ایم کرشنا نے پارٹی کا یہ احسان فراموش کردیا ہے۔ اسی طرح وزیراعلیٰ سدرامیا نے اپنی کابینہ میں وی سرینواس پرساد کو وزارت مالگذاری کا اہم قلمدان سونپا تھا، لیکن وہ بھی اس کا احسان نہیں رکھ پائے۔ مرکزی وزیر اننت کمار کی طرف سے بی جے پی اعلیٰ کمان کو بھاری رقم ادا کرنے کے متعلق اعتراف پر تبصرہ کرتے ہوئے دنیش گنڈو راؤ نے مطالبہ کیا کہ فوری طور پر اننت کمار عہدہ سے مستعفی ہوجائیں ۔