بنگلورو،23؍جون (ایس او نیوز) ریاستی وزیر اعلیٰ سدارامیا نے کانگریس کے ایم یل سی کے گووند راجو کی ڈائری سے متعلق میڈیا میں شائع ان خبروں کو یہ کہتے ہوئے مسترد کردیا کہ یہ خبریں جھوٹی اور غلط ہیں۔ میڈیا میں یہ خبریں شائع ہوئی ہیں کہ انکم ٹیکس حکام کے روبرو گووند راجو نے یہ اعتراف کرلیا ہے کہ انکم ٹیکس افسروں نے ان کے پاس سے جو ڈائری ضبط کی ہے اس میں درج تفصیلات سینئر کانگریس لیڈروں سے متعلق ہیں۔ وزیر اعلیٰ نے میڈیا سے سوال کیا کہ آپ کے پاس اس کے دستاویزات ہیں؟ جب ان سے کہاگیا کہ قومی میڈیا کے پاس دستاویزات موجود ہیں۔ انہوں نے پھر سوال کیا کہ کیا یہ دستاویزات آپ کے پاس موجود ہیں؟ کیا انہوں نے آپ کو ایسے دستاویزات دکھائے؟ یہ سب جھوٹی خبریں ہیں۔ وزیراعلیٰ نے کہا کہ میں پہلے بھی کہہ چکا ہوں کہ گووند راج کا اس ڈائری سے کوئی تعلق نہیں۔ گووند راج نے بھی بارہا یہ کہا ہے کہ ڈائری ان کی نہیں۔ پچھلے سال ماہ مارچ میں محکمہ انکم ٹیکس افسروں نے وزیراعلیٰ کے سیاسی صلاح کار گووند راج کے گھر پر چھاپہ مارکر ایک ڈائری اور چند دستاویزات ضبط کئے تھے۔ جس میں کانگریس کے مرکزی سینئر لیڈروں کو ریاستی وزیراعلیٰ اوروزراء کی جانب سے بھاری عطیہ جات دیئے جانے کی تفصیلات درج رہنے کا دعویٰ کیا گیا تھا۔