بنگلورو۔18؍اپریل(ایس او نیوز) وزیر اعلیٰ سدرامیا نے کہاکہ باگلکوٹ ضلع کے بادامی اسمبلی حلقے سے انتخاب لڑنے کے لئے وہاں کے پارٹی کارکن ان پر کافی دباؤ ڈال رہے ہیں۔ اسی لئے وہ اس حلقے سے انتخاب لڑنے پر غور کررہے ہیں ۔حالانکہ انہوں نے بادامی حلقے سے انتخاب نہ لڑنے کی وضاحت پارٹی اعلیٰ کمان کے سامنے کردی ہے، لیکن کل رات اس حلقے کے لیڈر بشمول رکن اسمبلی چمنکٹی کے فرزند کے علاوہ کے پی سی سی کارگذار صدر ایس آر پاٹل، جی ٹی پاٹل وغیرہ نے ان سے ملاقات کی اور گذارش کی کہ وہ بادامی حلقے سے انتخاب لڑیں۔ حالانکہ بادامی حلقے سے کانگریس نے دیوراج پاٹل کو ٹکٹ دے دیا ہے ، لیکن ان کا بی فارم ابھی ان کے سپرد نہیں کیاگیاہے۔ جس سے ان قیاس آرائیوں کو ہوا مل رہی ہے کہ سدرامیا اس حلقے سے امیدوار ہوسکتے ہیں۔