مودی ملک کے چوکیدار نہیں کرپشن کے حصے دار ہیں: سدرامیا
بنگلورو،13؍اگست(ایس او نیوز)سابق وزیر اعلیٰ اور ریاست میں حکمران اتحاد کے چیرمین سدرامیا نے آج وزیر اعظم نریندر مودی کو ملک میں کرپشن کا حصے دار قرار دیا۔
بیدر میں کانگریس کے انتخابی جلسے سے خطاب کرتے ہوئے سدرامیا نے کہاکہ وزیر اعظم مودی نے یہ کہہ کر ملک کا اقتدار سنبھالا تھاکہ وہ ملک کی چوکیداری کریں گے، اصل میں وہ اپنے کچھ سرمایہ دار دوستوں کے مفادات کی حفاظت کے لئے ان کے کرپشن میں حصے دار ی کررہے ہیں۔ انہوں نے کہاکہ چار سال بعد ملک کے عوام پر مودی کا اصلی چہرہ ظاہر ہوا ہے، عوام اب سمجھ چکے ہیں کہ مودی ملک کا کوئی بھلا نہیں کرسکتے۔ جھوٹے وعدوں اور تقریروں سے اب عوام کو گمراہ نہیں کیاجاسکتا۔ اقتدار پر رہ کر پانچ سال مودی نے ملک کے لئے کیا کیاہے اس کا جواب انہیں عوام کو دینا پڑے گا۔
سدرامیا نے کہاکہ آج ملک میں مودی کی سرپرستی میں بدعنوانی عام ہے۔ جھوٹے وعدوں سے عوام کو ایک ہی بار دھوکہ دیا جاسکتا ہے بار بار نہیں۔آنے والے انتخابات میں ملک کے عوام مودی کو ضرور سبق سکھائیں گے۔ انہوں نے کہاکہ لوک سبھا انتخابات میں کانگریس کی شاندار کامیابی ہوگی اور راہل گاندھی ملک کے اگلے وزیراعظم بنیں گے۔مودی کے من کی بات پر نکتہ چینی کرتے ہوئے سدرامیا نے کہاکہ ساڑھے چار سال میں مودی نے ایک بار بھی کام کی بات نہیں کی۔ دلتوں اور کمزور طبقات کے متعلق مودی کو لاپروا قرار دیتے ہوئے انہوں نے کہاکہ چکنی چپڑی باتوں سے دلتوں اورکسانوں کا کوئی بھلا نہیں ہوگا ، ان کی فلاح کے لئے مرکزنے اب تک کیا ٹھوس قدم اٹھائے ہیں بتائیں۔ انہوں نے کہاکہ مرکز کی یوپی اے حکومت نے حیدرآباد کرناٹک کو ترقی سے ہمکنار کرنے کے لئے اسے آئین کی دفعہ 371J کا حصہ بنایا اور اس علاقے کی ترقی کے تئیں اپنی دلچسپی کا ثبوت دیا۔