کانگریس وزراء کے لئے سدرامیا کا ڈنر ، سیاسی حلقوں میں ہلچل کا باعث
بنگلورو یکم اگست(ایس او نیوز) سابق وزیر اعلیٰ اور ریاست میں حکمران اتحاد کے چیرمین سدرامیا کی طرف سے کانگریس کے وزراء کے لئے منعقدہ ڈنر سیاسی حلقوں میں موضوع بحث بنا ہوا ہے۔ رابطہ کمیٹی کے چیرمین ہونے کے ساتھ سدرامیا کانگریس لیجسلیچر پارٹی کے لیڈر بھی ہیں ،ان کی طرف سے اچانک کانگریس وزراء کے لئے ڈنر کا اہتمام حکومت کی کارکردگی کا جائزہ لینے کے ساتھ کانگریس کے چند اہم فیصلوں کا پلاٹ فارم بھی بنا ہوا ہے۔ بتایا جاتاہے کہ وزیراعلیٰ کمار سوامی کی طرف سے کل مختلف اضلاع کے انچارج وزراء کی جو فہرست جاری کی گئی اس میں کانگریس کے بیشتر وزراء کو غیر اہم اضلاع دئے گئے ہیں۔ وزراء کی اکثریت وزیراعلیٰ کے فیصلے سے سخت ناراض ہے۔ خود سدرامیا نے بھی وزیراعلیٰ کے اس اقدام سے ناراضی کا اظہار کیا ہے۔ ان کا یہ ماننا ہے کہ انچارج وزراء کے تقررات کے معاملے میں ان کی رائے کو نظر انداز کردیاگیا ہے۔ سدرامیا کی طرف سے طلب کی گئی میٹنگ کے دوران آنے والے دنوں میں کانگریس کو مضبوط کرنے اور اقتدار میں زیادہ انحصار جنتادل (ایس) پر نہ کرنے کے متعلق بھی تبادلۂ خیال کیا گیا۔