بنگلور۔21؍ستمبر(ایس او  نیوز) سابق وزیر اعلیٰ اور ریاستی  حکمران اتحاد کی رابطہ کمیٹی کے چیرمین سدرامیا نے کہا ہے کہ ریاست میں بی جے پی کو ایک تعمیری اپوزیشن پارٹی کا رول ادا کرنا چاہئے، لیکن ایسا کرنے کے  بجائے انتہائی بے شرمی سے یہ پارٹی ریاستی حکومت کو گرانے کی کوششوں کو اپنا معمول بناچکی ہے۔

اخباری نمائندوں سے بات چیت کرتے ہوئے انہوں نے کہاکہ بی جے پی کے چند بے شرم لیڈروں کی وجہ سے ہر دن ایک نیا مسئلہ کھڑا کیا جارہاہے۔ ریاستی حکومت کے لئے ان لوگوں کی طرف سے کھڑی کی جانے والی پریشانیاں عارضی ہیں۔ آنے والے لوک سبھا انتخابات میں ریاست کے عوام ان لیڈروں کو ضرور سبق سکھائیں گے۔

بتایا جاتا ہے کہ سدرامیا نے بی جے پی کے رابطے میں آنے والے بعض کانگریس اراکین اسمبلی کو آڑے ہاتھوں لیا اور ان تمام کو متنبہ کیا ہے کہ وہ بی جے پی قائدین کے لالچ میں آکر اپنے سیاسی مستقبل کو تباہ نہ کریں۔ انہوں نے ہری ہر کے رکن اسمبلی رامپا ، ریاستی وزیر رمیش جارکی ہولی اور دیگر سے رابطہ کرکے ان تمام کو بی جے پی کی مبینہ سازشوں سے آگاہ کرایا اور کہاکہ بی جے پی قائدین کی طرف سے ان سے رابطے کی جتنی بھی کوشش کی جائے اس پر وہ کوئی جواب نہ دیں ، اگر جواب نہ دینے پر بی جے پی انہیں بدنام کرنے کی کوشش کرے تو اس پر بھی ردعمل ظاہر نہ کرے۔

ریاستی بی جے پی صدر یڈیورپا کے اس بیان پر کہ مرکزی حکومت بی جے پی کی ہے اسی لئے بی جے پی کی طرف سے ریاست میں اقتدار پر آنے کی کوشش ضرور کامیاب ہوگی، سدرامیا نے کہاکہ یڈیورپا کا یہ بیان اس بات کا ثبوت ہے کہ مرکزی حکومت ریاستی حکومت کو گرانے کی کوششوں میں لگی ہوئی ہے، لیکن اس کوشش میں یڈیورپا کبھی کامیاب نہیں ہوپائیں گے۔