وزیر اعظم کے نام سداپورکے نوجوان کا مراسلہ۔ الیکشن لڑنے کے لئے کم از کم تعلیمی قابلیت لازمی کی جائے
سداپور 12؍مارچ (ایس او نیوز)شیموگہ کے گورنمنٹ فرسٹ گریڈ کالج میں شعبہ کامرس کے طالب علم محمد ثاقب نے وزیراعظم نریندرمودی کو خط لکھ کر مطالبہ کیا ہے کہ ملک میں انتخاب لڑنے کے خواہشمند امیدواروں کے لئے کم از کم تعلیمی قابلیت لازمی کرنے والا قانون لاگو کیا جائے۔
سداپور کے رہنے والے محمد ثاقب نے وزیر اعظم کے نام اپنے مراسلے میں پوچھا ہے کہ’’ ملک میں انتخاب لڑنے کے لئے کم ازکم تعلیمی قابلیت کیوں ضروری نہیں ہے۔ ایک تعلیم یافتہ نوجوان کے طور پر میں ملک کے انتخابی نظام میں تبدیلیاں دیکھنے کا خواہشمندہوں، جس میں تعلیمی قابلیت کا ہونا بھی لازمی رہنا چاہیے۔‘‘
ثاقب کاکہنا ہے کہ ایک آدھ مہینے پہلے ٹی وی کے ایک پروگرام کے دوران یہ دیکھ کر وہ حیران رہ گئے کہ ایک ایم ایل اے کو اس لفظ کا فُل فارم بھی نہیں معلوم تھا۔تب میں نے اپنے آپ سے پوچھا کہ انتخاب لڑنے کے لئے تعلیمی قابلیت کیوں لازمی نہیں ہونی چاہیے۔مجھے یاد پڑتا ہے کہ سال نو کے آغاز پر وزیرا عظم نریندرمودی نے ’’من کی بات‘‘ نامی پروگرام میں کہا تھا کہ ’’اب وقت آگیا ہے کہ ہم اپنے ملک کو پوزیٹیو انڈیا سے پروگریسیو انڈیا میں تبدیل کریں‘‘۔ شکیب کا ماننا ہے کہ اگر ملک کو ترقی کی راہ پر گامزن کرنا ہے تو ایک نہیں بلکہ کئی طرح کی تبدیلیاں لانی ہوگی اور ان میں سے ایک اہم تبدیلی کے طور پر ایسا قانون بنانا ہوگا جس کے تحت الیکشن لڑنے کے لئے کم ازکم تعلیمی قابلیت لازمی ہو۔ثاقب نے بتایا کہ ’’مجھے اور بہت سے موضوعات پر وزیرا عظم سے بات کرنی ہے۔ اگر میرے مراسلے کے اس پہلے سوال کا جواب اگر مجھے مل جاتا ہے تو پھرمیں ان سے اگلے سوالات پوچھوں گا۔‘‘