بنگلورو،20؍ستمبر(ایس او نیوز) سابق ریاستی وزیر اور سینئر کانگریس لیڈر ستیش جارکی ہولی نے ان الزامات کو مسترد کردیا کہ جارکی ہولی برادران ریاستی حکومت کو غیر مستحکم کرنے کی کوششوں میں لگے ہوئے ہیں۔

اخباری نمائندوں سے بات چیت کرتے ہوئے انہوں نے کہاکہ جارکی ہولی برادران کی طرف سے کانگریس کو خیر باد کہنے کا کوئی سوال ہی نہیں اٹھتا۔ انہوں نے ان خبروں کو بھی بے بنیاد قرار دیاکہ رمیش جارکی ہولی نے نائب وزیراعلیٰ کا عہدہ مانگا۔ رمیش جارکی ہولی کی طرف سے بعض اراکین اسمبلی کو ریسارٹ منتقل کئے جانے کی خبروں کو بے بنیاد قرار دیتے ہوئے انہوں نے کہاکہ غیر ضروری طور پر جس طرح جارکی ہولی خاندان کا نام سیاسی انتشار سے جوڑا جارہاہے اس کی وجہ سے وہ سیاست سے تنگ آچکے ہیں۔ انہوں نے کہاکہ بی جے پی کے کسی بھی لیڈر نے ان سے رابطہ نہیں کیا ہے وہ کانگریسی ہیں اور کانگریس میں ہی رہیں گے۔

وزیراعلیٰ ایچ ڈی کمار سوامی، سابق وزیراعلیٰ سدرامیا، نائب وزیر اعلیٰ ڈاکٹر پرمیشور سے وہ تبادلۂ خیال کرچکے ہیں ان تمام نے یقین دلایا ہے کہ جو بھی مطالبات ہیں ان کو مرحلہ وار پورا کیا جائے گا۔مہاراشٹرا کے وزیرمالگزاری چندراکانتپاٹل سے ملاقات کے بارے میں ستیش نے کہاکہ چندرا کانت اور ان کے خاندان کے تعلقات 30 سال پرانے ہیں ان تعلقات کی وجہ سے انہوں نے ان سے ملاقات کی ، چندرا کانت کا تعلق بلگام کے نپانی سے ہے۔ اکثر وہ ان کے گھر آیا جایا کرتے ہیں اس کو سیاسی رنگ نہ دیا جائے۔