دبئی میں شیرور اسوسی ایشن کے زیر اہتمام گیٹ دو گیدر؛مرحوم باشو بھائی کی خدمات کو خراج عقیدت
دبئی، 14؍مئی (ایس او نیوز) شیرور اسوسی ایشن کے زیر اہتمام البستان ریسیڈنس میں شیروریئن کا گیٹ ٹو گیدر پروگرام منعقد کیا گیا۔ جس میں گرین ویلی اسکول شیرور کے بانی مرحوم جناب عبدالقادر عرف باشو بھائی کو ان کی بے لوث خدمات پر خراج عقیدت پیش کیا گیا اور ان کی خدمات کو پروجکٹر کے ذریعے ممبران کے روبرو پیش کیا گیا۔
مہمان خصوصی کے طور پر تشریف فرما شیرور کی بااثر شخصیت جناب منیگار محمد میراں صاحب نے اس موقع پر اپنے تاثرات پیش کرتے ہوئے بتایا کہ مرحوم باشو بھائی کی خدمات بہت ہیں لیکن ان کے چیریٹی کے کام کو کرنا ہم سب کے لئے ضروری ہے ۔ وہ ایک مخلص اور اثر و رسوخ رکھنے والے شخص تھے ۔ انہوں نے کہا کہ شیرور کے بہت سے مسائل ہیں، پرانی ایمبولنس کی جگہ نئی ایمبولنس سروس شروع کرنی ہے ۔روڈ کی خستہ حالی اور جگہ جگہ گندگی کی وجہ سے چند علاقوں سے گذرنا مشکل ہوتا ہے ۔ انہوں نے کہا کہ ان تمام مسائل کو کرناٹک کے انتخابی نتائج ظاہر ہونے کے بعد نئے ایم ایل اے کے سامنے رکھ کر حل کرنے کی کوشش کی جائے گی۔ انہوں نے کہا کہ اگر شیرور میں کہیں پانی کی قلت ہے تو متعلقہ علاقوں میں کنواں کھودنے کے لئے وہ ضروری تعاون فراہم کرنے کے لئے تیار ہیں ۔
جناب میراں صاحب نے نوجوانوں کو مشورہ دیا کہ وہ صرف شعبہ کامرس کی طرف توجہ نہ دے، بلکہ سائنس اور انجنیرنگ کی تعلیم بھی حاصل کریں۔ شیرور اسوسی ایشن کے سکریٹری کرشنا بلاوے نے اسوسی ایشن کی جملہ کاکردگی رپورٹ پیش کی ۔ سابق صدر جناب سید ابراھیم نے بھی مرحوم بھائی کی خدمات کا تدکرہ کیا اور اسوسی ایشن کی ترقی کے لئے سب کو مل کر بلا تفریق کام کرنے کی ضرورت پر زور دیا۔
پروگرام میں جناب محمد میراں منیگار کی خدمات کا بھی اعتراف کرتے ہوئے ان کی تہنیت و شال پوشی کی گئی ۔ شیرور میں ۴۲ سالوں سے مختلف سرکاری اسکولوں میں ٹیچر کی حیثیت سے خدمت انجام دینے والی بلقیس ٹیچر کی بھی تہنیت کی گئی ۔
گیٹ ٹوگیدر میں کوئز مقابلہ میں ممبران نے بڑھ چڑھ کر حصہ لیا، جبکہ ریفل ڈرا کے ذریعے بھی انعامات تقسیم کئے گئے ۔ مرد حضرات کا بمپر پرائز سید محمد اسفار کے نام اور عورتوں کا بمپر ڈراء محترمہ اشرف النساء کے نام نکلا ۔
شیرور اسوسی ایشن کے صدر جناب عبدالمناف مومن شیرور نے جلسہ کی صدارت کی ‘ جناب کے بی فیاض نے شکریہ ادا کیا۔ اور توصیف انصاری نے نظامت کے فرائض انجام دئے ۔ جناب ابراھیم کرانی ‘ جناب مصطفی گنگاولی ‘ جناب عبدالخالق ‘ پڈگار عبدالغنی ‘ ریاض کاپسی اور محمد رشاد وغیرہ پروگرام منعقد کرنے میں پیش پیش نظر آئے ۔
