شیرور:14/ مارچ (ایس اؤنیوز)کسی اسکول سے وداع یا فارغ ہونےکا مطلب یہ نہیں ہے کہ اپنے مادرِ علمی سے بے تعلق ہوجائیں۔ بلکہ طلبا ہمیشہ اپنی مادرِ علمی سے وابستہ رہتے ہوئے اس کی ترقی کی فکرکریں اور آپ ہی یعنی طلباہی مستقبل ہوتے ہیں آئندہ دنوں میں آپ طلبا کو ہی ذمہ داری سنبھالنی ہے۔ ان خیالات کا اظہار انجمن ڈگری کالج اینڈ پی جی سنٹر بھٹکل کے موظف پرنسپال پروفیسر ہاشم زرزری نے کیا۔

وہ یہاں 14مارچ بروز منگل کو شیرور کی توحید پبلک اسکول میں طلبا کے اعزاز میں منعقدہ وداعی تقریب میں مہمان خصوصی کی حیثیت سے شریک ہوکر طلبا سے خطاب کررہے تھے۔ موصوف نے اپنے خطاب میں طلبا کو بہت ہی آسان اور دلنشین انداز میں امتحانات کی تیاری کے متعلق مفید معلومات فراہم کیں ۔ انہوں نے بتایا کہ عام طورپر امتحان کا نام سنتے ہی یا امتحانات کے موقع پر طلبا بالخصوص طالبات ذہنی دباو ٔ، گھبراہٹ کا شکار ہوتے ہیں، رات بھر جاگتے رہ کر پڑھائی کرنے سے امتحان ہال میں بے ہوش ہوجاتے ہیں ،طلبا کو فطری انداز میں متوازن مطالعہ کرنا چاہئے ، حالات سے گھبرائے بغیر ان کا سامنا کرتے ہوئے آگے بڑھنا چاہئے۔ طلبا کی ہمت افزائی کے لئے اس موقع پر انہوں نے اپنے تجربات کی روشنی میں کئی واقعات کو بیان کیا۔ نظام بنا کر ترتیب سے پڑھائی کرنےکی تفصیل بتائی۔تقریب کی صدارت مینجر عبدالشکور صاحب نے کی۔ پروگرام کا آغاز محمد نعمان کی تلاوت قرآن سے ہوا۔ صائمہ نے مہمانوں کا استقبال کیا ۔ بی بی خدیجہ نے شکریہ کلمات ادا کئے ۔