بھٹکل: شرالی میں قومی شاہراہ کی توسیع کا دھرنا جاری؛ منکال وئیدیا نے رکن اسمبلی اور مرکزی وزیر پر لگایا شاہراہ معاملے پر جھوٹ بولنے کا الزام
بھٹکل:19؍فروری (ایس او نیوز)شرالی میں45میٹر چوڑائی والی قومی شاہراہ کا مطالبہ لے کر جاری دھرنے کے پانچویں دن سابق رکن اسمبلی منکال وئیدیا نے احتجاجیوں سے ملاقات کی اور رکن اسمبلی سنیل نائک اور مرکزی وزیر اننت کمار ہیگڈے پر جھوٹ بولنے کا الزام لگایا۔
منگل کو جائے دھرنا پر پہنچے سابق رکن اسمبلی وئیدیا نے احتجاجیوں سے شکایات کی سماعت کرنے کے بعد رکن اسمبلی اور مرکزی وزیرپر برس پڑے۔ انہوں نے کہاکہ بطور مرکزی وزیر مرکز کو اور بقیہ وزراء کو خط لکھنے سے کام ختم نہیں ہوگا، بلکہ نیشنل ہائی وے اتھارٹی سے ہی 45میٹر چوڑائی تک توسیع دینے کا حکم جاری کرانا ہوگا، آگے کہا کہ نیشنل ہائی وے اتھاریٹی کا حکم ملتے ہی 24گھنٹوں کے اندر وزیرا علیٰ اور دیگر ریاستی وزیر سے ملاقات کرتےہوئے ریاستی حکومت سے بھی منظوری لائی جاسکتی ہے۔
منکال وئیدیا جو اسمبلی انتخابات کے موقع پر بی جےپی کی طرف سے ہورہی بیان بازیوں کا جواب دینے سے زیادہ تر کتراتے رہے تھے، اچانک شرالی میں احتجاجیوں سے گفتگو کرتے ہوئے بی جے پی رکن اسمبلی اور رکن پارلیمان کو راست نشانے پر لیا۔ انہوں نے سنیل نائک کو مخاطب کرتے ہوئے کہا کہ رکن اسمبلی کو اپنے کاموں کے متعلق ذمہ داری ہونی چاہئے۔ جب عوام کو تکلیف ہورہی ہے تو اُنہیں خود آگے بڑھ کر کام پر روک لگانے کے لئے آگے آنا چاہئے تھا، بجائے ایسا کرنے کے، وہ عوام کو بے وقوف بنانے کے لئے مسئلہ کو ہی گھمانے میں لگے ہیں۔ انہوں نے کہا کہ عوام پچھلے پانچ دنوں سے دھرنے پر ہیں، جب کہ یہ کام عوام سے ہونے کا نہیں ہے ، بلکہ یہ عوامی نمائندوں کاکام ہے ، انہیں اس تعلق سے فکر ہونی چاہئے۔
رکن اسمبلی پر تنقید کرتے ہوئے منکال وئیدیا نے مزید کہاکہ میری رکن اسمبلی کی مدت کے دوران میں نے جن کاموں کے متعلق شہر میں فلیگس لگائے تھے، سنیل نائک نے ان ہی فلیکس کا مذاق اڑایا تھا، مگر آج وہ خود اُنہی کاموں کا افتتاح کررہے ہیں۔ دھرنے پر موجودچند بی جےپی کارکنوں نے منکال وئیدیا کی باتوں پر اعتراض جتاتے ہوئے کہاکہ یہ دھرنا کسی پارٹی کا نہیں ہے ، بلکہ پارٹیوں کی تفریق کئے بغیر عوامی مطالبے کے لئے ہم نے یہاں دھرنا دیا ہے، اس لئے کسی پر الزام نہ لگائیں، جب انہوں نے کہا کہ ہم سب متحد ہوکر شاہراہ کی توسیع کے لئے جدوجہد کررہے ہیں تو منکال وئیدیا نے وضاحت کرتے ہوئے کہاکہ شرالی کی قومی شاہراہ کے متعلق میں نےکوئی سیاسی بات نہیں کی ہے۔ مجھے عوام کی تکالیف کا حل مقصود ہے۔ آگے کہا کہ کام کو روکنے کے لئے عوامی نمائندوں اور لیڈروں کے ساتھ تاریخ طئے کریں ، میں بھی اس میں شرکت کرنے کے لئے تیار ہوں۔ تعلقہ پنچایت صدر ایشور نائک، نائب صدر رادھااشوک وئیدیا، ضلع پنچایت ممبر سندھو بھاسکرنائک، شرالی گرام پنچایت صدر وینکٹیش نائک، بھاسکر دئیمنے ، ناگپا نائک، شنکر نائک وغیرہ موجود تھے۔