بھٹکل شرالی نیشنل ہائی وے پر بس بائک پر چڑھ گئی؛ بائک سوار کی موقع پر موت
بھٹکل 30/ اپریل (ایس او نیوز) تعلقہ کے شرالی نیشنل ہائی وے پر پیش آئے ایک دردناک سڑک حادثہ میں ایک نوجوان کی موقع پر ہی موت واقع ہوگئی جس کی شناخت ہوناور تعلقہ کے منکی میں رہنے والے سنتوش اچاری (34) کی حیثیت سے کی گئی ہے۔
بتایا گیا ہے کہ ہوناور تعلقہ کے کرکی میں واقع KDCC بینک میں کلرک کی ملازمت کرنے والا سنتوش، آج اتوار کو چھٹی ہونے کی بناء پر بھٹکل میں اپنے رشتہ داروں سے ملنے کے لئے آیا تھا، رات قریب نو بجے اپنی بائک پر سوار وہ واپس منکی جارہا تھا کہ شرالی نیشنل ہائی وے پر غالباً کسی سواری کو اوورٹیک کرنے کے دوران تیز رفتار بس اس کی بائک سے ٹکراگئی۔ ٹکر لگتے ہی سنتوش بس کے ایک پہئے کی زد میں آگیا۔ عینی شاہدین نے بتایا کہ سنتوش حالانکہ ہیلمٹ میں تھا، مگر جیسے ہی بس کا ایک پہیہ ہیلمٹ پر چڑھا، ہیلمٹ بھی تکڑے ٹکڑے ہوگیا اور سنتوش نے موقع پر ہی دم توڑ دیا۔
بتایا گیا ہے کہ پرائیویٹ بس بنگلور سے مرڈیشور میں تفریح کے لئے آئی تھی اور رات قریب نو بجے بس مرڈیشور سے بھٹکل اور مینگلور ہوتے ہوئے بنگلور جانے کے لئے نکلی تھی، جس کے دوران یہ حادثہ پیش آیا۔
حادثے کے فوری بعد جائے وقوع پر لوگ کثیر تعداد میں جمع ہوگئے، خبر ملتے ہی پولس بھی موقع پر پہنچ گئی اور حالات کا جائزہ لینے کے بعد عوام کی مدد سے لاش کو بھٹکل سرکاری اسپتال منتقل کردیا۔
بھٹکل مضافاتی پولس نے فوری طور پر کاروائی کرتے ہوئے بس کو اپنی تحویل میں لے لیا اور ڈرائیور کو بھی گرفتار کرلیا۔ پولس مزید چھان بین کررہی ہے۔