نئی دہلی21 جنوری (ایس او نیوز؍آئی این ایس انڈیا) آئندہ لوک سبھا انتخابات میں عام آدمی پارٹی (آپ) کے اکیلے لڑنے کے اعلان کے بعد کانگریس دہلی میں اروند کجریوال حکومت کے خلاف جلد ہی وسیع تعلقات عامہ مہم شروع کرنے کی تیاری میں ہے۔ اس کے تحت وہ سابق وزیر اعلیٰ شیلا دیکشت کے ’ترقی ماڈل‘ کا مقابلہ کجریوال حکومت کی کارکردگی سے کرتے ہوئے اپنے حق میں ماحول بنانے کی کوشش کرے گی۔پارٹی ذرائع کا کہنا ہے کہ ریاستی کانگریس کمیٹی کا صدر بننے کے بعد شیلا دکشت تنظیم میں نئی جان پھونکنے کے ساتھ ہی پارٹی کے کھوئے ہوئے وقار اور شناخت کو واپس حاصل کرنے کے مقصد سے کم کر رہی ہیں۔ ان ہی کوششوں میں یہ تعلقات عامہ مہم بھی شامل ہے جو بلاک سطح پر چلائی جائے گی ۔ ذرائع کا یہ بھی کہنا ہے کہ عام آدمی پارٹی کے ساتھ اتحاد کے امکانات تقریبا ختم ہو جانے کے بعد شیلا دکشت کجریوال کو پوری طاقت کے ساتھ گھیرنے کی تیاری میں ہیں تاکہ فیصلہ کن ووٹ بینک کو پھر سے کانگریس کی جانب سے مائل کیا جا سکے جو کبھی اس کی ریڑھ ہوا کرتا تھا۔ اس سے مسلمانوں کو لبھانے کی ایک کوشش بھی کہی جاسکتی ہے ۔ پارٹی کی بنیاد کو مضبوط کرنے کے مقصد سے ہی شیلا نے تینوں ایگزیکٹوذمہ دار ن کو دہلی کے مختلف میونسپل علاقے کی ذمہ داری سونپی ہے۔ راجیش للوٹھیا کو شمالی دہلی، دیویندر یادو کو جنوبی دہلی اور ہارون یوسف کو مشرقی دہلی کی ذمہ داری سونپی گئی ہے۔دہلی صوبائی کانگریس کمیٹی کے ایگزیکٹو صدر راجیش للوٹھیا نے کہاکہ اب دہلی کے لوگوں کے سامنے ترقی کے دو ماڈل ہیں۔ ایک ماڈل شیلا دکشت کا ہے جس میں دہلی کی پوری تصویر بدل گئی۔ دوسرا ماڈل کجریوال کا ہے جس سے ترقی تھم گئی ہے ۔ انہوں نے کہا کہ ہم جلد ہی بلاک سطح پر جائیں گے اور تعلقات عامہ مہم کے ذریعے عوام کو بتائیں گے کہ دہلی کی ترقی شیلا دکشت کے ترقیاتی ماڈل سے ہی ہو سکتی ہے۔ للوٹھیا نے کہا کہ پارٹی کی بنیاد کو مضبوط کرنے کے مقصد سے دہلی کانگریس کی طرف سے شروع کئے جانے والے تمام پروگراموں کے بارے میں جلد اعلان کیا جائے گا۔