شرم جیوی بم دھماکہ معاملہ میں مجرم عالمگیرر ونی کو سزائے موت
جونپور، 30؍جولائی(ایس اونیوز/آئی این ایس انڈیا )اتر پردیش کے جون پور ضلع کی ایک عدالت نے2005میں شرم جیوی ایکسپریس ٹرین میں ہوئے بم دھماکے معاملہ میں کل29؍جولائی کو مجرم قرار دئیے گئے بنگلہ دیشی شہری عالمگیر عرف رونی کو آج موت کی سزا سنائی ہے۔فرسٹ ایڈیشنل سیشن جج بدھی رام یادو نے ملزم رونی کو موت کی سزاکے ساتھ ساتھ اس پر7 لاکھ روپے کا جرمانہ بھی عائد کیا ہے۔رونی کو عدالت نے کل مجرم قرار دیا تھا اور سزا کا تعین آج کیا ہے۔اس واقعہ کے دوسرے ملزم عبیدالرحمان کے معاملے میں 2؍اگست کو فیصلہ ہوگا اور مجرم پائے جانے پر سزا کا تعین کیا جائے گا، دیگر ملزمان کے خلاف سماعت کا سلسلہ ابھی چل رہا ہے۔واضح رہے کہ28؍جولائی2005کو 5.20بجے شام جونپور ضلع کے سگرامؤ کے ہرپال گنج ریلوے کراسنگ کے قریب شرم جیوی ایکسپریس میں بم دھماکے ہوئے تھے ۔ جس میں12افراد کی موت ہو گئی تھی، اس حادثے میں درجنوں افراد زخمی بھی ہوئے تھے۔ٹرین کے گارڈ ظفر علی نے جی آر پی تھانہ میں اس واقعہ کی ایف آئی آر درج کرائی تھی ۔اس واقعہ کی پولیس کے ساتھ گہری تحقیقات کے بعد ملک کی بڑی سیکورٹی ایجنسیوں نے عالمگیر عرف رونی، عبیدالرحمان عرف بابو کے علاوہ وشواش رہائشی مرشدآباد مغربی بنگال اور سوہاگ عرف ہلال رہائشی بنگلہ دیش کے خلاف الگ الگ چارج شیٹ داخل کی گئی تھی ۔رونی اوربابوفی الحال جونپور جیل میں اور وشواش اور ہلال حیدرآباد جیل میں بند ہے، جبکہ دیگر ملزمان میں شریف عرف کنچن فرار ہے اور غلام پازدانی عرف یحیی اور ڈاکٹر سعید کی موت ہو چکی ہے۔فیصلے کے وقت عدالت میں بھاری تعداد میں پی اے سی اورپولیس فورس کو تعینات کیا گیا تھا ۔عدالت کے احاطے میں آنے والوں کی سختی سے تلاشی بھی لی جا رہی تھی۔