ورلڈ الیون کی قیادت شاہد آفریدی کریں گے
کراچی ،30؍مئی ( ایس او نیوز؍آئی این ایس انڈیا ) انٹرنیشنل کرکٹ کونسل نے اعلان کیا ہے کہ اوئن مورگن کے زخمی ہونے کے بعد ویسٹ انڈیز کے خلاف ٹی 20 میچ میں ورلڈ الیون کی قیادت اب پاکستان کے اسٹارآل راؤنڈرشاہد آفریدی کریں گے۔ورلڈ الیون اور ویسٹ انڈیز کے درمیان 31 مئی کو ایک خیراتی میچ لندن کے تاریخی گراؤنڈ لارڈز میں کھیلا جائے گا جس کا مقصد گذشتہ سال 2017 میں جزائر غرب الہند میں ارما اور مریا نامی سمندری طوفانوں سے کرکٹ کے میدانوں کو پہنچنے والے نقصانات کی تعمیر و مرمت کے لیے چندہ جمع کرنا ہے۔ایک رپورٹ کے مطابق انگلینڈ کی ایک روزہ ٹیم کے کپتان اوئن مورگن انگلی فریکچر ہونے کے باعث اس مقابلے میں شرکت نہیں کر سکیں گے اور ان کی جگہ سابق پاکستانی کپتان شاہد آفریدی کپتانی کے فرائض سرانجام دیں گے۔اوئن مورگن اتوار کو مڈل سیکس اور سمرسیٹ کے درمیان کاونٹی میچ کے دوران فیلڈنگ کرتے ہوئے زخمی ہوئے تھے۔شاہد آفریدی نے آئی سی سی کے اعلان کے بعد سوشل میڈیا کے ذریعے اپنے ردعمل کا اظہار کرتے ہوئے کہا ہے کہ ایک اچھے مقصد کے لیے ورلڈ الیون ٹیم کی قیادت کرنا ان کے لیے اعزاز کی بات ہے۔