اڈپی 29؍اگست (ایس او نیوز)منی پال کے ٹی ایم اے پائی پولی ٹیکنیک کالج کے وائس پرنسپال کنداپور کے سری کانت پائی پر الزام ہے کہ اس نے کالج کی ایک خاتون لیکچرار کے ساتھ جنسی ہراسانی کا معاملہ کیا ہے۔اس کے خلاف احتجاجی مظاہرہ کرتے ہوئے کالج کے طلباء نے مطالبہ کیا ہے کہ مذکورہ وائس پرنسپال کو فوری طورپر برخاست کیا جائے۔خیال رہے کہ اس وقت کالج میں 932 طلباء زیر تعلیم ہیں اور انہوں نے وائس پرنسپال کے برخاست کیے جانے تک کلاسس میں حاضر نہ رہنے کا منصوبہ بنایا ہے۔
ذرائع سے ملنے والی تفصیلات کے مطابق سری کانت نے سنیچر کے دن اسٹاف روم میں جاکر خاتون لیکچرار کے ساتھ دست درازی کی جس کو دیکھتے ہوئے اس لیکچرار نے شور مچانا شروع کیا۔ شور سن کر کچھ لوگ اس خاتون کی مدد کو پہنچے اور سری کانت کے جنسی حملے سے اس کو بچا لیا۔اسی دن اس معاملے میں منی پال پولیس اسٹیشن میں ایک کیس درج کردیا گیا۔جب کالج کے طلباء کو اس واقعے کے خبر ملی تو پیر کے دن انہوں نے اپنی کلاسس کا بائیکاٹ کیا اور وائس پرنسپال کے خلاف احتجاج پراتر آئے۔
سری کانت کے بارے میں بتایا جاتا ہے کہ وہ جس فیکلٹی میں ہیڈ آف دی ڈپارٹمنٹ ہے، اسی فیکلٹی میں یہ خاتون لیکچرار ذمہ داری انجام دے رہی تھی۔اور کچھ عرصے سے سری کانت مذکورہ لیکچرار کے موبائل پر نامناسب پیغامات بھیجنے لگا تھا۔اس کے علاوہ سری کانت پر بعض لوگ اس بات کا بھی الزام لگاتے ہوئے پائے گئے ہیں کہ اس نے طالبات کے ساتھ بھی دو ایک بار غلط برتاو کیا ہے۔منی پال کالج کیمپس میں پولیس موجود ہے مگر تاحال سری کانت کے گرفتار کیے جانے کی کوئی اطلاع موصول نہیں ہوئی ہے۔
کالج کے ذمہ دار مسٹر رنگا پائی نے بتایا کہ سری کانت کالج سے معطل کردیا گیا ہے۔اورمحکمہ جاتی تحقیقات کا آغاز کردیا ہے۔چونکہ طلباء سری کانت کو اس کے عہدے سے ہٹانے برخاست کرنے کا مطالبہ کررہے ہیں، اس لئے ہم قانونی مشورہ بھی لے رہے ہیں۔ہم پولیس کے ساتھ بھرپور تعاون کریں گے اور قانون کے مطابق اس کے خلاف کارروائی کی جائے گی۔