بنگلور26ستمبر (ایس او نیوز) مدھیہ پردیش کے ھردا ڈسٹرکٹ ہیڈکوارٹر کے دودھ ڈیری علاقے سے چار روز قبل اغوا شدہ سات نابالغ بچوں کو ھردا پولیس نے آج بنگلور میں تلاش کرکے انہیں اپنے تحفظ میں لے لیا۔یہ تمام بچے پولیس ٹیم کے ساتھ آج رات بنگلور سے ھردا کیلئے روانہ ہوں گے۔پولیس ذرائع نے یہاں یواین آئی کو بتایا کہ اس معاملے میں فی الحال کسی کی گرفتاری نہیں ہوئی ہے۔ اغوا کردہ ان بچوں کو اغوا کرکے لے جانے والوں کی تلاش میں پولیس سرگرم ہوگئی ہے۔اس سلسلے میں وجے راٹھور نامی ایک شخص کا نام سامنے آیا ہے۔ذرائع نے بتایا کہ مقامی گوجر بورڈنگ علاقے کے ایک شخص نے ان بچوں کو بورڈنگ کمپنی میں کام کرنے کے عوض انا نامی کسی شخص سے پیسے لئے ہیں۔ پولیس بادی النظر میں اس معاملے کوچائلڈ ٹریفکنگ کے پہلو سے بھی دیکھ رہی ہے۔ان سات بچوں کو اغوا کرکے لے جانے میں وجے راٹھور نامی ایک شخص کو کلیدی ملزم مانا جا رہا ہے۔ذرائع کا کہنا ہے کہ پولیس کی پہلی ترجیح بچوں کو صحیح سلامت تلاش کرنا تھا۔ ان بچوں کے واپس لوٹنے کے بعد ان کے بیان کی بنیاد پر کلیدی ملزم سمیت دیگر ملزمان کی تفصیلات ملتے ہی ان کے خلاف ضروری کارروائی کی جائے گی۔ھردا کی ایڈیشنل پولیس سپرنٹنڈنٹ کرن لتا کیرکیٹا نے بتایا کہ ھردا میں ان سات بچوں کے گھر سے لاپتہ ہونے اور انہیں ایک شخص کے ذریعے اغوا کرنے کی شکایت ان کے گھروالوں نے 22 ستمبر کو ھردا تھانہ کوتوالی میں درج کرائی تھی۔اغوا کے اس معاملہ میں پولیس نے نامعلوم افراد کے خلاف معاملہ بھی درج کیا تھا. پولیس نے آج بنگلور سے کمل، جے، کمل، سنیل، راجیش، موہت اور پون نام کے بچوں کو برآمد کیا ہے۔