وجئے پورا: 31/جنوری (ایس او نیوز) وجئے پورا (عرف بیجاپور) کے انڈی تعلقہ کے زولکی نیشنل ہائی وے 13 پر ایک ساتھ چار سواریوں کی آپس میں ٹکر ہوجانے سے دو لاری ڈرائیور سمیت تین لوگ ہلاک ہوگئے، جبکہ دیگر دو شدید زخمی ہوگئے۔
حادثہ جمعرات صبح کی اولین ساعتوں میں پیش آیا۔
ذرائع سے ملی اطلاع کے مطابق پہلے دو لاریوں میں زبردست ٹکر ہوئی، جس کے فوری بعد پیچھے سے آرہی ایک اور لاری ٹکر ماری ہوئی لاری سے پیچھے سے ٹکراگئی، دوسری لاری کے پیچھے آرہی ایک کار بھی اس حادثے کی زد میں آگئی اس طرح ایک ساتھ چار سواریاں ایک دوسرے سے ٹکراگئیں۔
بتایا گیا ہے کہ پہلے ٹکر مارنے والی دونوں لاریوں کے ڈرائیور حادثے میں موقع پر ہی جاں بحق ہوگئے، جبکہ ایک کلینر بھی حادثے کا شکار ہوگیا، اسی طرح دوسری لاری کا ڈرائیور اور کار کا ڈرائیور حادثے میں زخمی ہوگیا۔
حادثے کی وجہ سے پورا نیشنل ہائی وے قریب ایک گھنٹے تک بند رہا ، بعد میں پولس نے چاروں سواریوں کو الگ کرکے کنارے کرتے ہوئے ٹریفک نظام کو بحال کیا۔ نیشن ہائی وے بند ہوجانے سے سڑک کے دونوں طرف سواریوں کی لمبی قطار لگ گئی تھی۔
انڈی پولس نے حادثے کے تعلق سے معاملہ درج کرلیا ہے، چھان بین جاری ہے۔