سینئر سیاسی قائد اور سابق وزیر تعلیم بی اے محی الدین انتقال کرگئے
منگلورو10؍جولائی (ایس او نیوز)ساحلی علاقے کے ایک سینئر سیاسی قائداورسابق وزیربرائے اعلیٰ تعلیم بی اے محی الدین (۸۱سال) کچھ عرصے تک علیل رہنے کے بعد بنگلورو کے ایک اسپتال میں انتقال کرگئے۔
اطلاع کے مطابق پچھلے دنوں طبیعت خراب ہونے پر انہیں منگلورو کے اسپتال میں علاج کے لئے داخل کیا گیا تھا۔طبیعت میں سدھار آنے پر وہ بنگلورو چلے گئے تھے۔لیکن وہاں پھر دوبارہ ان کی طبیعت بگڑ گئی تو انہیں ایم ایس رامیا اسپتال میں داخل کیا گیا جہاں آج منگل صبح وہ انتقال کرگئے۔ بتایا گیا ہے کہ تدفین کے لئے ان کی میت منگلورو لائی جائے گی۔
بجپے عبدالقادر محی الدین یعنی بی اے محی الدین، جنوبی کینرا کے وہ پہلے مسلم سیاسی قائد تھے جنہیں ضلع انچارج وزیر ہونے کا شرف حاصل ہواتھا۔پانچ دہائیوں تک عوامی زندگی میں رہنے کے باوجودوہ سیاسی اور سماجی زندگی میں ایک بے داغ کردار کے مالک تھے اورانہیں بہت ہی عزت و احترام کی نگاہ سے دیکھا جاتا تھا۔ان کی شناخت ایک دور اندیش مسلم قائد کے روپ میں بھی ہے جنہوں نے مسلمانوں کے اندر تعلیمی ترقی کا انقلاب لانے میں بڑی جد وجہد کی تھی۔جس کی وجہ سے بجپے کے اطراف و اکناف میں کئی مقاما ت پرجدید اسکول قائم ہوئے اور خاص کر مسلم لڑکیوں میں تعلیم حاصل کرنے کا جذبہ فروغ پایا۔