بنگلورو23؍جنوری (ایس او نیوز) کانگریس کے چندقائدین کی جانب سے کرناٹک پردیش کانگریس کمیٹی (کے پی سی سی) صدر دنیش گنڈو راؤ پر اظہار عدم اطمینان کی اطلاع ہے۔ کہا جارہا ہے کہ نائب وزیراعلیٰ جی پرمیشور وزیر آبی وسائل ڈی کے شیوکمار سمیت پارٹی کے کئی سینئر قائدین گنڈو راؤ کی کارکردگی سے خوش نہیں ہیں۔ پارٹی میں باربار پیدا ہورہی الجھنوں کو سلجھانے میں گنڈو راؤ مکمل طور پر ناکام رہے ہیں۔ ممبئی میں پارٹی کے اراکین اسمبلی کے قیام کئے جانے کے معاملہ کو سلجھانے میں بھی وہ ناکام رہے۔ علاوہ ازیں لوک سبھا انتخابات سر پر ہونے کے باوجود کے پی سی سی کے صدر صرف بنگلور میں وقت گزاررہے ہیں۔ تمام کو ساتھ لے جانے کی صلاحیت ولیاقت ان میں بالکل نہیں ہے۔ کے پی سی سی کے کارگزار صدر ایشور کھنڈرے کے ساتھ بھی ان کی سرد جنگ جاری ہے۔ یہ تمام مسائل کانگریس پارٹی کو بھنور میں لے جارہے ہیں۔ بطور کارگزار جو کام وہ کررہے تھے اب صدر ہونے کے باوجود وہ کام نہیں کررہے ہیں۔ صرف سدارامیا کی چھاؤں بنے ہوئے ہیں۔ بس ان کی ہدایت کے مطابق کام کررہے ہیں جس کی وجہ سے پارٹی کے کئی قائدین ان سے ناراض ہوگئے ہیں۔