جارکی ہولی برادران کی دوروں پر کانگریس قیادت برہم
بنگلورو،20؍جولائی(ایس او نیوز) بارہا شمالی کرناٹک کے جارکی ہولی برادران کی طرف سے ریاستی مخلوط حکومت کو کمزور کرنے کی کوششوں اور اپنی طاقت کے مظاہرے پر کانگریس اعلیٰ کمان نے سخت ناراضی کا اظہار کیا ہے، حال ہی میں ریاستی وزیر رمیش جارکی ہولی کی طرف سے گیارہ اراکین اسمبلی کے ساتھ دورۂ اجمیر کیاتھا اور ان کے ساتھ ان کے بڑے بھائی ستیش جارکی ہولی نے چند اراکین اسمبلی کے ساتھ دورۂ سکم کیاتھا۔
کانگریس اعلیٰ کمان نے اراکین کو لے کر اس طرح دوروں پر ناراضی کا اظہار کرتے ہوئے کہا ہے کہ ایسے وقت میں جبکہ لوک سبھا انتخابات سرپر ہیں اس طرح کے دوروں اور پارٹی کو بلیک میل کرنے کی کوشش درست نہیں ہے۔پارٹی کے مختلف حلقوں میں ریاستی کابینہ میں توسیع اور سرکاری بورڈز اور کارپوریشنوں کے لئے تقررات کی مانگ پر زور دیا جارہا ہے ، اس دوران رمیش جارکی ہولی نے گیارہ اراکین اسمبلی کے ہمراہ اجمیر روانہ ہونے کا فیصلہ کیا جبکہ ستیش جارکی ہولی نے متعدد اراکین اسمبلی کو لے کر سکم نکل پڑے۔ اس دوران دونوں بھائی نے واضح کیا ہے کہ ان کے یہ دورے پہلے سے طے شدہ تھے اسی لئے ان پر کسی طرح کا مطلب نکالنے کی کوئی ضرورت نہیں ہے۔ رمیش جارکی ہولی نے کہا ہے کہ انتخابات کے مرحلے میں انہوں نے نیت کی تھی کہ انتخاب میں کامیابی پر وہ اجمیر جائیں گے، اس کو سیاسی رنگ نہ دیا جائے۔ ستیش جارکی ہولی نے بھی واضح کیا ہے کہ ان کے دورے کا مقصد ریاستی حکومت کو کسی طرح کا نقصان پہنچانا قطعاً نہیں ہے۔