ضلع اُترکنڑا کے ڈانڈیلی میں ہوراٹا سمیتی کے صدر اور سنئیر وکیل اجیت نائیک کا وحشیانہ قتل
بھٹکل 27/جولائی (ایس او نیوز) ضلع اُترکنڑا کے ڈانڈیلی میں ایک معروف وکیل پر دھاردار ہتھیار سے حملہ کرنے کے نتیجے میں وکیل کی موقع پر ہی موت واقع ہونے کی واردات آج جمعہ کی شب قریب سوا نو بجے پیش آئی ہے۔ حملہ کی اطلاع پھیلتے ہی ڈانڈیلی میں حالات کشیدہ ہوگئے ہیں اور عوام کی کافی بڑی تعداد اسپتال کے باہر جمع ہوگئی ہے ۔ بتایا گیا ہے کہ حالات کو قابو میں رکھنے کے لئے پولس کا بھی سخت انتظام کیا گیا ہے۔
مرنے والے کی شناخت اجیت نائیک (57) کی حیثیت سے کی گئی ہے جو ڈا نڈیلی کو تعلقہ تشکیل دینے والی مہم چلانے والی کمیٹی ڈانڈیلی ہوراٹا سمیتی کے صدرہونے کے ساتھ ساتھ معروف وکیل اور بار اسوسی ایشن کے بھی صدر تھے، وہ ڈانڈیلی میونسپالٹی کے بھی سابق صدر رہ چکے تھے۔ ذرائع کے مطابق انہوں نے اپنے پیچھے بیوہ اور دو بیٹوں کو چھوڑا ہے۔
ذرائع نے بتایا کہ وہ آج جمعہ رات قریب سوا نو بجے اپنے آفس کا کام ختم کرکے گھر جانے کےلئے کار پر سوار ہوہی رہے تھے کہ ایک نقاب پوش شرپسند نے تلوار سے اُن پر حملہ کردیا اور انہیں لہولہان کرتے ہوئے قتل کردیا۔ بتایا گیاہے کہ حملہ میں سر اور کان دونوں طرف گہرے زخم آئے اور وہ خون میں لت پت ہوکر نیچے گرپڑے ، یہاں دل دہلادینے والا منظر تھا۔ موقع پر موجود لوگوں نے فوری اُنہیں مقامی اسپتال پہنچایا مگر کوئی فائدہ نہیں ہوا۔ ذرائع سے معلوم ہوا کہ حملہ اتنا زبردست تھا کہ وہ موقع پر ہی ہلاک ہوگئے۔
تلوار سے حملہ کرنے کی خبر جنگل کی آگ کی طرح پورے شہر میں پھیل گئی اور لوگ بڑی تعداد میں اسپتال کے باہر جمع ہو گئے۔اطلاع ملتے ہی ڈی وائی ایس پی موہن پرساد، سی پی آئی انیس مجاورسمیت دیگر پولس اہلکاروں نے موقع پرپہنچ کر حالات کا جائزہ لیا اور اسپتال پہنچ کر بھی لاش کا معائنہ کیا۔
بتایا جارہا ہے کہ دانڈیلی کی تاریخ میں ایسی وحشیانہ قتل کی یہ پہلی واردات ہے۔اس موقع پر اسپتال کے باہر جمع عوام نے پولس سے مطالبہ کیا کہ وہ ملزم کو فوری گرفتار کرے، عوام نے متنبہ کیا کہ فوری گرفتار نہ کرنے کی صورت میں عوام احتجاج پر اُتریں گے۔ حالات پر قابو پانے کے لئے پولس کا یہاںسخت بندوبست کیا گیا ہے۔
دانڈیلی پولس نے قتل کا معاملہ درج کرتے ہوئے چھان بین شروع کردی ہے۔