ممبئی، 12؍جون(ایس او نیوز؍آئی این ایس انڈیا )مدھیہ پردیش کے وزیراعلیٰ شیوراج سنگھ چوہان کے بھوک ہڑتال پر جانے کے مسئلے کو لے کر نشانہ سادھتے ہوئے پیر کو شیو سینا نے کہا کہ شیوراج سنگھ نے کسانوں کی تحریک کو ختم کرانے کے لیے گاندھی وادی طریقے کا سہارا لیا، جبکہ ان کی اپنی پارٹی کے صدر نے مہاتما گاندھی کو ’چالاک بنیا ‘کہا تھا۔

شیوسینا نے اپنے ترجمان اخبار سامنا  میں  کہا کہ وزیر اعلی کا کام اقتدار چلانا ہوتا ہے، بھوک ہڑتال پر بیٹھ جانا ہندوستانیوں کے خلاف ہو رہے ظلم سے لڑنے کے لیے مہاتما گاندھی کا ہتھیار تھا، آج اس ملک میں نہ تو برطانیہ اور نہ ہی کانگریس حکومت کر رہی ہے۔قرض معافی اور اپنی فصلوں کے لیے امدادی قیمت کا مطالبہ کرنے والے کسانوں سے امن کی اپیل کرتے ہوئے چوہان ہفتہ کو غیر معینہ بھوک ہڑتال پر بیٹھ گئے تھے۔انہوں نے کچھ منصوبوں کا اعلان کرتے ہوئے اگلے دن انشن توڑ دیا تھا، لیکن فساد سے منسلک سرگرمیوں میں ملوث لوگوں کو سخت وارننگ دی تھی ۔

غورطلب ہے کہ شیوراج سنگھ چوہان کے بھوک ہڑتال سے ایک ہی دن پہلے یعنی جمعہ کو بی جے پی کے قومی صدر امت شاہ نے رائے پور میں کہا تھا کہ مہاتما گاندھی ایک ’چالاک بنیا‘ تھا ، جس نے آزادی کے بعد کانگریس کو تحلیل کرنے کا صحیح مشورہ دیا تھا ۔شیوسینا نے اپنے اداریہ میں کہا ہے کہ بی جے پی کے صدر تو مہاتما گاندھی پر تبصرہ کر رہے تھے، وہیں ان کی پارٹی کے سینئر لیڈر اپنی ریاست کے مسائل کو حل کرنے کے لیے گاندھی وادی طریقوں کا استعمال کر رہے ہیں۔