بھٹکل میں جماعت اسلامی ہند کی جانب سے آج سے سیرت مہم کا ہوگیا آغاز
بھٹکل 16/نومبر ﴿ایس او نیوز﴾ ربیع الاول کی مناسبت سے جماعت اسلامی ہند کی جانب سے آج جمعہ 16 نومبر سے ریاست گیر سطح پر ’’حضرت محمد ﷺ بنی نوع انسان کے عظیم رہنما‘‘ عنوان پر سیرت مہم کا آغاز ہوگیا۔ بھٹکل میں اس مہم کا آغاز بعد نماز جمعہ مسجد احمد سعید میں خطیب مسجد مولانا جعفر فقی بھاو ندوی کی دُعا کے ساتھ ہوا۔ اسی موضوع پر انہوں نے آج جمعہ کا خطبہ بھی دیا۔
اس موقع پر تفصیلات فراہم کرتے ہوئے سیرت مہم کے کنوینر مولانا ایس ایم سید زبیر نے بتایا کہ مہم کے تحت بھٹکل تعلقہ سطح پر کئی ایک پروگرام تشکیل دئیے گئے ہیں جس کے دوران عوام وخواص، افسران ، اساتذہ وغیرہ سے انفرادی و اجتماعی ملاقاتوں کا اہتمام کیا جائے گا۔ مہم میں حضور اکرم ﷺ کی سیرت اور اُن کی تعلیمات کو عام کرنے مضمون نویسی مقابلہ بھی رکھا جائے گا، کالج لکچرر، کارنر میٹنگ اور کتابوں کی تقسیم وغیرہ بھی کی جائے گی۔
اس موقع پر معروف سنئر صحافی ڈاکٹر حنیف شباب، مولانا یاسر برماور ندوی، مقامی جماعت اسلامی ہند کے سکریٹری پروفیسر ہاشم زرزری، قادر میراں پٹیل و دیگر کافی ذمہ داران موجود تھے۔
