کاروار9؍نومبر(ایس اونیوز) حکومت کرناٹکا کی جانب سے 10نومبر کو ریاست گیر پیمانے پر حضرت ٹیپو سلطان کی جینتی منائی جانے والی ہے۔ فرقہ پرست طاقتیں اس کی مخالفت کررہی ہیں۔ گزشتہ سالوں میں بھی ٹیپو جینتی منانے کے موقع پر ریاست کے کچھ مقامات پر ناخوشگوار واقعات اور تشددکے معاملے سامنے آئے تھے۔

امسال بھی فرقہ پرست حلقوں کی جانب سے ٹیپو جینتی کے سخت مخالفت کی جارہی ہے اور ممکن ہے کہ اس سلسلے میں کچھ مقامات پر حالات کشیدہ ہوجائیں ۔اس لئے امکانی خطرات کے پیش نظر حکومت نے پولیس اور ضلع انتظامیہ کو امن و امان بنائے رکھنے کے لئے سخت اقدامات کرنے کے احکامات دئے ہیں۔

حکومت کے ان احکامات پر عمل کرتے ہوئے ضلع شمالی کینر ا کے ڈپٹی کمشنر ایس ایس نکول نے کرناٹکا پولیس ایکٹ 1963کی دفعہ 35(3)کے تحت ضلع شمالی کینرا میں عوامی مقامات پر کھلے عام جلسوں ، ریالی، جلوس، نعرے بازی، احتجاجی مظاہرے وغیرہ کرنے پر مورخہ 10اکتوبر صبح 6بجے سے مورخہ 11 اکتوبر شام 6بجے تک پابندی لگا دی ہے۔ ڈی سی کی طرف سے جاری احکام کے مطابق اس عرصے میں کہیں بھی کوئی احتجاجی مظاہرہ یا کھلے عام جلسہ منعقد نہیں کیا جا سکے گا۔البتہ اس پابندی کا اطلاق بند کمروں اور ہال وغیرہ میں منعقد کیے جانے والے روزمرّہ کے پروگراموں پر نہیں ہوگا۔