بنگلورو،16؍فروری(ایس اونیوز) شہرمیں واقع پراپنا اگرہارا سینٹرل جیل میں بند آل انڈیا دراوڑ منیتر کشگم (اے آئی ڈی ایم کے ) کی جنرل سکریٹری وی کے ششی کلا کے حامیوں کی بڑی تعداد میں یہاں پہنچنے کے پیش نظر جیل کے چاروں طرف سکیورٹی کے انتظامات میں مزید اضافہ کیا گیا ہے ۔محترمہ ششی کلا اور دو دیگر کو آمدنی کے معلوم ذرائع سے زیادہ جائداد رکھنے (ڈی اے )کے معاملے میں نچلی عدالت سے ملی سزا کو برقرار رکھنے کے سپریم کورٹ کے حکم کے بعد اے آئی ڈی ایم کے کی لیڈر نے کل جیل میں خصوصی عدالت کے سامنے خودسپردگی کردی تھی ۔کرناٹک ہائی کورٹ نے تینوں کو بری کردیا تھا لیکن سپریم کورٹ نے انہیں چار سال کی سزا اور 10،10کروڑ روپے کا جرمانہ دینے کا حکم دیا ہے ۔کرناٹک ریاستی ریزرو پولیس کے دو دستوں کو جیل کے پاس تعینات کیا گیاہے اور جیل کی سمت جانے والے سبھی راستوں پر گھیرابندی کرکے جیل کی سمت جانے والی گاڑیوں پر پابندی لگا رکھی ہے ۔نامہ نگاروں کو بھی جیل کے احاطے کی سمت جانے سے روکا جارہا ہے اور انہیں جیل سے 100میٹر کی دوری پر روکا جارہا ہے ۔اسی دوران خصوصی عدالت نے جیل میں گھر کا کھانا فراہم کرانے کی محترمہ ششی کلا کی درخواست کو ٹھکرا دیا۔وہ جیل کے احاطے میں سبھی قیدیوں کیلئے تیار ہونے والا کھانا ہی کھائیں گی اور جیل افسروں کی جانب سے دئے جانے والے کپڑے ہی پہنیں گی۔ذرائع نے بتایا کہ قیدیوں کو صبح چھ بجے چائے یا کافی،ساڑھے سات بجے ناشتہ،اس کے بعد ساڑھے گیارہ بجے دوپہر کا کھانا اور ساڑھے چھ بجے رات کا کھانا دیا جاتا ہے ۔