کاسرگوڈمیں ایک ہفتے کے لئے امتناعی احکامات
کاسرگوڈ 22؍مارچ (ایس او نیوز) یہاں پر ہونے والے مدرسے کے استاد ریاض (۳۴سال) کے بہیمانہ قتل کے پس منظر میں امن و امان کی بگڑتی صورتحال کو قابو میں رکھنے کے لئے ڈسٹرکٹ کلکٹر جیون بابونے ایک ہفتے تک کے لئے امتناعی احکامات کی دفعہ ۱۴۴ نافذ کرنے کا حکم جاری کردیا ہے۔
خیال رہے کہ21مارچ کو ھدی ٰ جامع مسجد سے متصل کمرے میں مدرسہ کے استاد ریاض کا کسی نے بہیمانہ انداز میں قتل کردیا تھا۔کہتے ہیں کہ آدھی راتکے وقت کمرے میں گھس کر جان لیوا حملہ کرنے کی وجہ سے ریاض کے جسم پر زخموں کے 28نشان پائے گئے تھے جس میں سے گردن اور سر کے پیچھے والے زخم بہت گہرے تھے۔ قتل کے ذمہ داران اور اس کے پیچھے کارفرما مقصد کے بارے میں ابھی کوئی بھی سراغ ہاتھ نہیں لگا ہے۔ اس قتل کے خلاف عوام کے اندر سخت ناراضی اور برہمی پائی جاتی ہے۔ اس کے ساتھ ہی مسلم لیگ کی طرف سے احتجاجی بند کا جو اعلان کیا گیا تھا اس میں بھی بعض مقامات پر تشدد کی واقعات ہوئے تھے ۔ اس بگڑتی صورتحال کی وجہ سے ضلع انتظامیہ نے احتیاطی طور پر امتناعی احکام نافذ کیے ہیں جو 27مارچ تک جاری رہیں گے۔