نئی دہلی،23؍جولائی(ایس او نیوز؍آئی این ایس انڈیا)عراق میں لاپتہ39ہندوستانیوں پر آج تک کی تحقیقاتی رپورٹ کے بعد اٹھے سوالوں پر نئی دہلی عراقی سفارت خانے نے ردعمل ظاہر کیاہے۔عراقی ہائی کمشنر کی جانب سے کہا گیا ہے کہ2014میں آئی ایس نے جن39ہندوستانیوں کویرغمال بنایاتھا،ان کی تلاش جاری ہے۔بھارت اور عراق کی متعلقہ ایجنسیاں ان کی تلاش میں لگی ہیں۔حکومت ہند نے لاپتہ ہندوستانیوں کی تلاش میں پہلے ہی اعلی سطح کے دو وفد عراق بھیجے ہیں۔تاکہ معاملے سے منسلک معلومات کو جٹایا جاسکے۔عراقی سفارت خانے نے کہا ہے کہ جہاں تک آئی ایس کی جانب سے بھرتی کیے گئے ہندوستانیوں کا سوال ہے تو اس سلسلے میں میڈیارپورٹ کے علاوہ کوئی معلومات نہیں ہے۔اس معاملے میں بھی بھارت اور عراق کی متعلقہ ایجنسیاں مل کر کام کر رہی ہیں۔اس دوران مرکزی وزیر دھرمیندر پردھان نے لاپتہ ہندوستانیوں کے اہل خانہ سے صبررکھنے کوکہاہے۔وزیرنے کہاکہ حکومت ہر قدم اٹھا رہی ہے۔ہندوستانیوں کی تلاش میں کوئی کسر نہیں اٹھا رکھیں گے۔