ہم سیلنگ کے نہیں، اس کے طریقے کے خلاف ہیں:ہردیپ سنگھ پوری
نئی دہلی،25؍اپریل (ایس او نیوز؍ آئی این ایس انڈیا ) وزیر مملکت برائے شہری وترقی ہردیپ سنگھ پوری نے کہا ہے کہ دہلی میں کنورزن چارج دینے والوں کی املاک بھی سیل کئے جانے جیسے واقعات کے پیش نظر انہوں نے سیلنگ کے طریقے پر سوال اٹھایا ہے۔پوری نے آج رہائش اور شہری ترقی کارپوریشن(ہڈکو)کے یوم تاسیس کی تقریب کے بعد اپنے کل کے اس بیان پر صفائی دیتے ہوئے یہ بات کہی جس میں انہوں نے کہا تھا کہ سیلنگ کمیٹی کے لوگ اے سی کمروں میں بیٹھ کر کام کرتے ہیں، انہیں زمینی حقیقت کا پتہ ہی نہیں ہوتا ہے۔ پوری نے کہا کہ میں اپیل کی مخالفت نہیں کر رہا ہوں، بلکہ صرف یہ کہہ رہا ہوں کہ انسانی مفادات کی زمینی حقیقت کو دیکھ کر اپیل کی جائے۔انہوں نے کہا کہ کئی ایسے معاملے سامنے آئے ہیں جہاں’ڈسیل‘کی گئی املاک کو سیل کر دیا گیا۔اس سے سیلنگ کے طریقے پر سوال اٹھنا لازمی ہے۔پوری نے کہاکہ آپ کو پتہ ہے سیلنگ سے کتنے لوگ بے روزگار ہوئے اور کتنوں کو بے گھر ہونا پڑا۔تو جب تک آپ حقیقت کو نہیں سمجھیں گے اس وقت تک تکنیکی باتوں کا کوئی فائدہ نہیں ہے۔انہوں نے کہا کہ عدالت کے حکم میں دخل نہیں دے رہے ہیں نا ہی یہ کہہ رہے ہیں کہ لوگ غیر قانونی تعمیراتی کام کریں، ان کا صرف اتنا کہنا ہے کہ دہلی کے ماسٹر پلان میں ترمیم کرکے ہی دہلی میں غیر قانونی تعمیر اور تجاوز کے اس مسئلہ انسانی بنیاد پر حل نکالا جا سکتا ہے۔قابل ذکر ہے کہ ماسٹر پلان میں ترمیم پر سپریم کورٹ نے روک لگائی ہے۔پوری نے اس معاملے کی اگلی سماعت پر عدالت کی طرف سے یہ پابندی ہٹائے جانے کی امید ظاہر کرتے ہوئے کہا کہ ایسا ہونے پر ماسٹر پلان میں ترمیم کی جائے گی۔