مبینہ اشتعال انگیز مقرر چکرورتی سولی بیلے کی بھٹکل آمد پر ایس ڈی پی آئی نے کی سخت مخالفت؛ پولس محکمہ کو دیا میمورنڈم
بھٹکل یکم اکتوبر (ایس او نیوز) مُبینہ اشتعال انگیز مقرر چکرورتی سولی بیلے کی بھٹکل میں منعقدہ پروگرام میں آمد کو لے کر سوشیل ڈیموکریٹک پارٹی آف انڈیا نے سخت مخالفت کرتے ہوئے بھٹکل محکمہ پولس کو میمورنڈم پیش کیا ہے۔
بھٹکل ٹائون پولس تھانہ کے باہر ڈی وائی ایس پی کے نام دئے گئے میمورنڈم کو بھٹکل پی ایس آئی نے وصول کیا، اس موقع پر ایس ڈی پی آئی کے ضلعی صدر محمد توفیق بیری نے متنبہ کیا کہ چکرورتی سولی بیلے اگر بھٹکل میں آکر اشتعال انگیز خطاب کرتا ہے اور شہر کے عوام کو فساد کے لئے اُکساتا ہے تو پھر شہر کے پرامن فضا میں تشدد رونما ہونے کی صورت میں پولس اور ضلعی انتظامیہ ذمہ دار ہوگی۔ انہوں نے پولس حکام سے مطالبہ کیا کہ اُسے بھٹکل میں آنے سے روکا جائے اور بھٹکل کے امن و امان کی فضا کو بگاڑنے کی کسی بھی طرح کی کوشش کو کامیاب نہ ہونے دیا جائے۔
میمورنڈم میں واضح کیا گیا ہے کہ مسلمانوں کے خلاف اور دو مذاہب کے درمیان زہر کے بیج بونے میں بدنام اشتعال انگیز مقرر چکرورتی سولے بیلے یکم اکتوبر کو بھٹکل میں منعقد ہونے والے پروگرام میں شریک ہونے کے لئے آرہا ہے، پولس کے لئے ضروری ہے کہ اس کے خلاف اشتعال انگیز بھاشن دینے کی صورت میں سخت قانونی کاروائی کی جائے، اگر پولس اس کے خلاف کاروائی نہیں کرتی تو پھر آگے جو کچھ بھی ہوگا اُس کے لئے پولس محکمہ اور ضلعی انتظامیہ ذمہ دار ہوگی۔
میمورنڈم پیش کرنے کے موقع پر ایس ڈی پی آئی کے اسمبلی صدر وسیم منیگار، جنرل سکریٹری محمد سفیان، ضلعی کونسل ممبر عبدالعظیم، محمد ثاقب اور محمد طیب موجود تھے۔
خیال رہے کہ سوامی وویکانند کے چکاگو بھاشن کے 125سال مکمل ہونے کی یاد میں ’’ پھر ایک بار بڑی فتح ‘‘ کے نام سے ایک ریلی نکالی گئی ہے جو یکم اکتوبر کو بھٹکل پہنچے گی۔ اس موقع پر یکم اکتوبر کی صبح 30-08بجے رتھ یاترا ، پھول بازار، ماری کٹہ ، اولڈ بس اسٹانڈ اور شمس الدین سرکل سے ہوتے ہوئے گروسدھیندرا کالج میدان پہنچے گی، جہاں یوا برگیڈ کے رہنما چکرورتی سولی بیلے کا کلیدی خطاب ہوگا۔