احمد آباد 10؍دسمبر(ایس او نیوز؍ پریس ریلیز) سوشیل ڈیموکریٹک پارٹی آف انڈیا کی جانب سے گجرات احمدآباد ہوٹل ہوسٹ ان میں "جن آدیش سمیلن "کے عنوان کے تحت ایک کانفرنس کا انعقاد کیا۔ جس میں 400سے زائد سماجی اور سیاسی فعال کارکنان نے شرکت کی۔ اجلاس کی صدارت ایس ڈی پی آئی قومی نائب صدر اڈوکیٹ شرف الدین احمد نے کی۔ اس اجلاس میں ایس ڈی پی آئی قومی جنرل سکریٹریان محمد شفیع، ایم کے ۔ فیضی،کرناٹک ریاستی جنرل سکریٹری عبدالمجید،راجستھان ریاستی صدر محمد رضوان خان، ریاستی جنرل سکریٹری محمد حنیف،ایس ڈی پی آئی قومی کوآرڈینٹر ڈاکٹر نظام الدین،ایس ڈی پی آئی گجرات کی ریاستی صدر محترمہ کم کم جی اور مہمان خصوصی کے طور پر ممبئی ہائی کورٹ کے ریٹائرڈ جج جسٹس بی جی کولسے پاٹل شریک رہے۔ اجلاس میں مقررین نے اپنے خطاب میں کہا کہ ہمارے ملک کا سیاسی منظرنامہ جمہوریت کے اقداروں سے ہٹ چکا ہے۔ فسطائی طاقتیں اپنی پوری قوت سے اپنا فرقہ وارانہ ایجنڈا نافذ کرنے میں سر گرم ہیں ۔ آئین ہند کی جگہ ہندتوا ایجنڈے کو نفاذ کرنے کی کوشش کی جارہی ہے کیونکہ پارلیمنٹ میں جو حزب اختلاف پارٹیاں ہیں وہ آر ایس ایس کے مذکورہ مشین کو روکنے میں ناکام ہیں۔ یہ بات واضح طور پر سامنے آچکی ہے کہاگر وہ اپنے ایجنڈے میں کامیاب ہوگئے تو ہم اپنے ملک میں جمہوریت کو بچا نہیں سکتے ہیں۔ اگر ہم اب بھی چوکنے نہیں ہونگے تو ہم ہمارے ملک کے سیکولر اقدار کو بچانے سے قاصر رہ جائیں گے جس ہمارے ملک کے عام عوام کی آزادی چھن جائے گی۔ لہذا ایس ڈی پی آئی نے قوی ارادے کے ساتھ ملک کے آئین کی تحفظ، امن و امان، سیکولرازم اور انسانی حقوق کی پاسداری کرنے کی ذمہ داری لیتے ہوئے سب سے پہلے گجرات سے فسطائی طاقتوں کو اقتدار سے بے دخل کرنے کے لیے گجرات اسمبلی انتخابات میں سیکولر سیاسی پارٹی کو حمایت دے رہی ہے۔ ایس ڈی پی آئی کو مکمل یقین ہے کہ گجرات میں ایک ہی پارٹی واضح اکثریت سے کامیاب ہوگی اور فسطائی طاقتوں کے ناپاک ارادوں کو ناکام کرے گی۔