تلنگانہ چرچ پر حملہ, ایس ڈی پی آئی کے وفد کا دورہ
بنگلورویکم جون (ایس او نیوز) حیدر آباد تنلگانہ کے کیسر پولیس اسٹیشن حدود میں چرچ پر حملے کے پس منظر میں سوشیل ڈیموکریٹک پارٹی آف انڈیا کے وفد نے جائے واردات کا دورہ کیا۔ اس وفد میں ایس ڈی پی آئی کرناٹکا کے سکریٹری الفانسو فرانکو، اکرم حسن، تلنگانہ پی ایف آئی کے ریاستی جنرل سکریٹری عابد شیخ، حیدرآباد کے ہیومن رائٹس موومنٹ کے کرشنا، بابو ریڈی وغیرہ شامل تھے۔
رومن کیتھولک عیسائی فرقے کے فاطمہ چرچ کا افتتاح حال ہی میں ہواتھااور وہاں مذہبی سرگرمیاں جاری تھیں۔ مگر کچھ شرپسندوں کے ورغلانے پر بعض لوگوں نے اشتعال انگیز نعرے لگاتے ہوئے اس چرچ پر حملہ کرکے وہاں موجود مورتی، الیکٹرانک اور الیکٹرک اشیاء کو توڑ پھوڑ کر رکھ دیاہے۔اس حملے کے بعداس مقام پر پولیس کا حفاظتی بندوبست کردیا گیا ہے مگر چرچ میں مذہبی سرگرمیوں پر زبردستی روک لگادی گئی ہے۔
ایس ڈی پی آئی کے وفد نے مقامی عیسائیوں خاندانوں سے ملاقات کی اور ان کے ساتھ ہمدردی کا اظہار کرتے ہوئے ان کی ہمت بندھائی۔ اور یقین دلایا کے اس ضمن میں قانونی کارروائی کے لئے ایس ڈی پی آئی کی طرف سے ہر طرح کی حمایت حاصل رہے گی۔ اس کے علاو ہ وفد نے پولیس کے اعلیٰ افسران سے بھی ملاقات کی اور شرپسندوں کے خلاف کڑی کارروائی کرنے اور علاقے میں امن وامان برقرار رکھنے کی تدابیر اختیار کرنے کا مطالبہ کیا۔ایس ڈی پی آئی نے یہ مطالبہ بھی کیا ہے کہ جلد سے جلد چرچ کی مذہبی سرگرمیاں جاری کرنے کے اقدامات کیے جائیں اور جن عیسائیوں کو نقصان پہنچایا گیا ہے انہیں فوری طور پر ریلیف فراہم کی جائے ۔اور ملک میں حالیہ دنوں میں عیسائیوں، مسلمانوں اور دلتوں پر جو ظلم و ستم کا سلسلہ شروع کیا گیا ہے اس پر پابندی لگانے کی طرف مرکزی سرکار فوری توجہ دے۔