بھٹکل 31؍جولائی (ایس او نیوز) سوشیل ڈیموکریٹک پارٹی آف انڈیا کے ذمہ داران نے ہیبلے گرام پنچایت کے حدود میں کچرے کی نکاسی کا نظام نہیں ہونے کی وجہ سے عوام کو درپیش مسائل اجاگر کرتے ہوئے تحصیلدار ،اسسٹنٹ کمشنر بھٹکل ، بھٹکل تعلقہ پنچایت صدر اور ڈپٹی کمشنرکاروار کو میمورنڈم دیا۔
میمورنڈم میں اس بات کا ذکر کیا گیا ہے کہ ہیبلے پنچایت کے جامعہ آباد، حنیف آباد اور مدینہ کالونی وغیرہ میں کچرا نکاسی کا کوئی معقول نظام نہیں ہے، جس کی وجہ سے سڑکوں کے کنارے ہر جگہ کچرے کے ڈھیر لگ رہے ہیں۔ اس کی وجہ سے ان راستوں پرنہ صرف چلنا پھرنا دشوار ہوگیا ہے بلکہ عوام کا جینا مشکل ہوگیا ہے۔اس مسئلے کی طرف سرکاری حکام اور متعلقہ ذمہ داران کومیمورنڈم دے کر بار بار توجہ دلانے کے باوجود ابھی تک اس کا کوئی حل نہیں نکالا گیا ہے۔اس سے گرام پنچایت افسران کی غفلت اور بے پروائی صاف ظاہر ہوتی ہے۔
میمورنڈم کے ساتھ مختلف علاقوں میں موجود کچروں کے ڈھیر کی تصاویر منسلک کرتے ہوئے مطالبہ کیا گیا ہے کہ اس مسئلے کو آئندہ پندرہ دنوں کے اندر حل کیا جانا چاہیے۔ ایسا نہ ہونے کی صورت میں سخت احتجاجی مظاہرے کی دھمکی دی گئی ہے۔
اس موقع پر ایس ڈی پی آئی کے تعلقہ صدر وسیم منیگار، ضلع صدر توفیق ، یوسف ملا، سفیان ڈڈی او ر دیگر اراکین موجود تھے۔