بھٹکل میں اسکوٹر اور اومنی کی ٹکر؛ طالبا سمیت دو زخمی
بھٹکل 22/نومبر (ایس او نیوز) یہاں شفاء کراس کے قریب نیشنل ہائی وے پر ہوئے ایک سڑک حادثہ میں اسکوٹر پر سوار طالبا سمیت دو لوگ شدید زخمی ہوگئے، جنہیں بھٹکل سرکاری اسپتال میں ابتدائی طبی امداد کے بعد کنداپور منتقل کیا گیا ہے۔ حادثہ آج بدھ صبح قریب 8:30 بجے پیش آیا۔
بتایا گیا ہے اسکوٹر پر سوار سدانند نارائن موگیر (45) گاندھی نگر، ہیبلے سے اپنی 12سالہ لڑکی پرتھوی موگیر کواسکوٹر پر بٹھاکر اسکول چھوڑنے جارہا تھا، جس کے دوران کسی سواری کو اوورٹیک کرنے کی کوشش میں مخالف سمت سے آنے والی ایک ماروتی اومنی سے کافی تیز رفتاری کے ساتھ ٹکرا گیا۔ ٹکر اتنی شدید تھی کہ سدانند کے سر پر چوٹ لگنے کے ساتھ ساتھ اس کی ایک ٹانگ کو بھی شدید چوٹ لگی ہے۔ البتہ اس کی دُختر پرتھوی کو معمولی چوٹ لگی ہے۔ عینی شاہدین نے بتایا کہ غالباً سدانند کو اپنی لڑکی کو جلد سے جلد اسکول چھوڑنے کی جلدی تھی، جس کی کوشش میں حادثہ پیش آیا۔
مقامی لوگوں نے فوری طور پر باپ اور بیٹی دونوں کو مقامی سرکاری اسپتال پہنچایا، جہاں سے طبی امداد کے بعد دونوں کو کنداپور لے جایا گیا ہے۔
بھٹکل ٹائون پولس تھانہ میں معاملہ درج کیا گیا ہے۔