کوڈاگو میں قدرتی آفت کی وجہ سے بند کیے گئے تعلیمی ادارے دوبارہ کھل گئے
مڈیکیرے27؍اگست (ایس او نیوز)انتہائی موسلادھار بارش اور زمین کھسکنے اور سیلاب جیسے قدرتی آفتوں کی وجہ سے کوڈاگو کی عام زندگی گزشتہ 20دنوں سے جومفلوج ہوگئی تھی، اب وہ دھیرے دھیرے نارمل ہوتی جارہی ہے۔
اسی پس منظر میں ضلع ڈپٹی کمشنر پی آئی شری وئیدیا نے بتایا کہ طلبہ کو چھٹی دیتے ہوئے تعلیمی اداروں کو جو بند کر دیاگیا تھاانہیں 27اگست سے کھول دیا گیا ہے۔اور مڈیکیرے جیسے شہری علاقے میں آنگن واڈی سے کالج سطح کے تمام تعلیمی اداروں میں معمول کے مطابق درس و تدریس کا سلسلہ شروع ہوجائے گا۔
ضلع ڈی سی نے بتایا ہے کہ مڈیکیرے شہری علاقے میں جن تعلیمی اداروں میں ریلیف کیمپ بنائے گئے ہیں، وہاں فی الحال تعلیم کا سلسلہ شروع نہیں کیا جارہا ہے ۔طلبہ کا تعلیمی مفاد دیکھتے ہوئے ان اداروں سے متعلقہ طلبہ کو دوسرے قریبی اسکولوں میں شامل کرکے وہاں ان کے لئے تدریس کا انتظام کیا جائے گا۔