ریاض،27اپریل(ایس او نیوز/آئی این ایس انڈیا)سعودی عرب کی وزارت داخلہ نے کہا ہے کہ بارڈر سیکیورٹی فورسز نے یمن کی سرحد سے متصل علاقے جازان میں سعودی تیل کمپنی ’ارامکو‘ کے آئل اسٹیشن پر بارود سے بھری کشتی سے حملے کی سازش ناکام بنا دی۔ سعودی فورسز نے سمندر میں تیزی کے ساتھ ارامکو کے ایک آئل اسٹیشن کی طرف بڑھنے والی کشتی پکڑی ہے۔ اس کشتی پر کوئی شخص سوار نہیں تھا مگر یہ بارود سے بھری ہوئی تھی۔ اس کے انجنوں پر فائرنگ کر کے اسے خود کار طریقے سے چلانے اور ارامکو اڈے کے قریب پہنچا کر اسے دھماکے سے تباہ کرنے کی منصوبہ بندی کی گئی تھی۔بیان میں کہا گیا ہے کہ سعودی بارڈر سیکیورٹی فورسز اور نیوی نے مل کر بارود سے بھری کشتی میں نصب دھماکہ خیز مواد کو پھٹنے سے بچالیا۔