ریاض ،14؍جولائی (ایس او نیوز؍آئی این ایس انڈیا )سعودی عرب کے صوبے جازان میں تعینات مملکت کی فوج نے بدھ کی شب عسکری کارروائیاں کرتے ہوئے یمن کے ضلع حرض میں حوثی ملیشیا اور معزول صدر صالح کے پاسداران کے ٹھکانوں کو نشانہ بنایا۔ مذکورہ یمنی علاقہ سعودی عرب کی سرحد سے 9کلو میٹر دور ہے۔یمنی باغیوں کی سعودی سرحد کی جانب نقل و حرکت نظر میں آ جانے کے بعد سعودی فوج نے توپ خانوں کے ذریعے ان مسلح عناصر کو نشانہ بنایا۔ذرائع ابلاغ کے مطابق ،سعودی سرحد کی جانب پیش قدمی سے قبل باغی ملیشیاؤں نے کئی راکٹ داغے جو غیر آباد علاقوں میں گرے۔عسکری ذرائع نے تصدیق کی ہے کہ سعودی فوج کارروائی کے دوران یمنی ملیشیا کے 20سے زیادہ ارکان کو ہلاک کرنے میں کامیابی ملی ،جب کہ متعدد جنگجو زخمی بھی ہوئے۔ علاوہ ازیں بعض اہم گڑھ بھی تباہ کر دئیے گئے جہاں ان ملیشیا کے عناصر نے پناہ لے رکھی تھی۔