جازان؍ریاض 17فروری ( ایس او نیوز؍آئی این ایس انڈیا ) سعودی عرب کی فوج نے جازان صوبے کے مقابل یمن کی سرحد کے نزدیک واقع علاقے میں حوثی عناصر کی جانب سے دراندازی کی کوشش کو ناکام بنا دیا۔جدید ہتھیار رکھنے والے سعودی فوج کے پیدل دستوں نے گھات لگا کر پہاڑی علاقوں میں چھپے حوثیوں کو ان کی منصوبہ بندی پر عمل کرنے سے روکا۔جمعے کی شب حوثیوں نے پہلے اپنے تین ارکان کو آگے بھیجا۔ ان میں سے ایک نے واپس آ کر راستہ صاف ہونے کی اطلاع دی۔ بعد ازاں حوثیوں کا گروپ آگے بڑھا اور سعودی فوج کی گھات کا نشانہ بن گیا، اس دوران 13 حوثی مارے گئے۔پچھلی صفوں میں موجود حوثیوں نے سعودی دستے پر مارٹر گولے اور راکٹ داغے تاہم سعودی فوج کے توپ خانوں اور عرب اتحاد کے طیاروں نے ان عناصر کو نشانہ بنا ڈالا۔ اس طرح ہلاک ہونے والے حوثی باغیوں کی مجموعی تعداد 30 سے زیادہ ہو گئی۔ ساتھ ہی ان کے راکٹ لانچروں کو بھی تباہ کر دیا گیا۔