ریاض،24اگست؍(ایس او نیوز/آئی این ایس انڈیا)سعودی عرب میں اطلاعات کے مطابق شیعہ آبادی کی اکثریت پر مشتمل مشرقی علاقے قطیف میں سکیورٹی فورسز نے ایک مسجد پر حملے کو ناکام بنا دیا ہے۔سعودی عرب کے ٹی وی عرب نیوز کے مطابق قطیف کے ایک گاؤں امہ الحمام میں سکیورٹی فورسز کی فائرنگ میں ایک مشتبہ حملہ آور مارا گیا۔سکائی نیوز عربیہ نے سکیورٹی فورسز کے حوالے سے بتایا ہے کہ ایک حملہ آور کی ہلاکت کے علاوہ ایک کو زندہ گرفتار کیا گیا ہے۔عرب نیوز نے بتایا ہے کہ مارے جانے والے حملہ آور نے بارود سے بھری جیکٹ پہن رکھی تھی۔بعض غیر مصدقہ اطلاعات کے مطابق گرفتار اور ہلاک ہونے والے مشتبہ حملہ آور کا تعلق سعودی عرب سے نہیں تھا تاہم ان اطلاعات کی تصدیق نہیں ہو سکی۔خیال رہے کہ سعودی عرب میں گذشتہ کچھ عرصے سے شدت پسندی کے واقعات میں اضافہ دیکھنے میں آیا ہے۔پانچ جولائی کو سعودی عرب کے تین شہروں میں خودکش حملے کیے گئے تھے۔ سب سے پہلا جدہ میں امریکی قونصلیٹ کے باہر، دوسرا شیعہ اکثریتی علاقے قطیف اور تیسرا مدینہ میں مسجد نبوی کے قریب ہوا تھا۔قطیف میں اس سے پہلے بھی شدت پسندی کے واقعات میں شیعہ آبادی کو نشانہ بنایا جا چکا ہے۔