سعودی عرب میں اسٹیٹ سکیورٹی پریزیڈنسی کے قیام کا حکم
ریاض، 21/جولائی (ایس او نیوز/آئی این ایس انڈیا)سعودی فرمانروا شاہ سلمان بن عبدالعزیز آل سعود نے ایک شاہی فرمان کے تحت ملک میں سلامتی سے متعلق امور کی نگرانی کے لیے اسٹیٹ سکیورٹی پریزیڈنسی تشکیل دینے کا حکم دیا ہے۔ شاہی فرمان کے تحت ریاستی سلامتی کا مجوزہ ادارہ کابینہ کے ماتحت ہوگا۔شاہی فرمان کے مطابق،ملک کے تمام سکیورٹی ادارے اسٹیٹ سکیورٹی سے مربوط ہوں گے۔ اس ادارے کی قیادت جنرل انویسٹی گیشن کے ڈائریکٹر جنرل عبدالعزیز الہویرینی کو سونپی گئی ہے۔ انہیں ایک وزیر کے برابر پروٹوکول دیا جائے گا۔ اس کے علاوہ وہ جنرل انویسٹی گیشن کی ذمہ داریاں بھی انجام دیں گے۔جنرل انویسٹی گیشن ڈائریکٹوریٹ، اسپیشل سکیورٹی فورسز، ایمرجنسی فورس، فضائی سکیورٹی، جنرل ایڈ منسٹریشن برائے تکنیکی امور، نیشنل انفارمیشن سینٹر، انسداد دہشت گرد، فنڈنگ اور مالیاتی تحقیقات کا شعبہ بھی اسٹیٹ سکیورٹی پریزیڈنسی میں شامل ہوگا۔