سعودی عرب : 50 سے زیادہ بڑی عالمی فرموں کو کاروبار کے اجازت ناموں کا اجراء
نیویارک،22؍ستمبر(ایس او نیوز؍آئی این ایس انڈیا)سعودی عرب کی وزارت تجارت اور سرمایہ کاری نے گذشتہ نو ماہ کے دوران میں پچاس سے زیادہ بڑی عالمی کمپنیوں اور فرموں کو مملکت میں کاروبار کے لیے لائسنس جاری کردیے ہیں۔
سعودی وزیر برائے تجارت اور سرمایہ کاری ماجد القصبی نے نیویارک میں گلوبل بزنس فورم کے موقع پر ایک انٹرویو میں بتایا ہے کہ جن کمپنیوں کو کام کے اجازت نامے جاری کیے گیے ہیں،ان میں 23 امریکی ہیں اور ان میں ایچ پی اور بوئنگ بھی شامل ہیں۔انھوں نے بتایا ہے کہ آیندہ دو ہفتوں میں وزارت تجارت اور سرمایہ کاری چھے مزید کمپنیوں کو سعودی عرب میں کام کے اجازت نامے جاری کردے گی۔ان میں سے دو کمپنیاں ٹیکنالوجی کے شعبے میں کام کرتی ہیں، تین آپریشنز اور مرمت کا کام کرتی ہیں اور ایک دواساز کمپنی ہے۔
انھوں نے کہا کہ سعودی عرب نجی شعبے کی شراکت بڑھانے اور غیرملکی سرمایہ کاری کو راغب کرنے کی کوششوں کے ضمن میں بنک دیوالیہ کے ایک قانون اور تجارتی قرضوں کے نظام سمیت مختلف قوانین نافذ کرنے کے لیے اقدامات کررہی ہے۔سعودی وزیر نے بتایا ہے کہ بنک دیوالیہ قانون منظوری کے لیے شوریٰ کونسل کو بھیج دیا گیا ہے اور ہمیں امید ہے کہ اس پر 2018ء کی پہلی سہ ماہی میں عمل درآمد کا آغاز ہوجائے گا۔تجارتی قرضوں کے نظام سے متعلق قانون کو بھی دو سے تین ہفتوں میں شوریٰ کونسل کو بھیج دیا جائے گا۔اس کے بعد تجارتی فر نچائز کے نظام کا قانون بھی تیار کرکے منظوری کے لیے بھیجا جائے گا۔