سعودی عرب:عازمین حج کی 1200سرجریاں مکمل،سعودیہ میں حجاج کرام کے 108دل کے آپریشن
مکہ مکرمہ،24اگست(ایس او نیوز؍آئی این ایس انڈیا)سعودی عرب کی وزارت صحت کی طرف سے جاری کردہ ایک بیان میں کہا گیا ہے کہ مکہ معظمہ اور مدینہ منورہ کے تمام اسپتالوں میں عازمین حج کو ہرممکن طبی سہولیات کی فراہمی جاری ہے۔ بیان میں کہا گیا ہے کہ رواں موسم حج میں اب تک بیرون ملک سے آنے والے عازمین حج کی سیکڑوں سرجریاں کی گئی ہیں۔ ان میں دل کے 102آپریشن، اوپن ہارٹ سرجری کے 6، گردوں کے 752، آنکھوں کے 32 اور دیگر متفرق 259 سرجریاں کی گئیں۔
وزارت صحت کے مطابق عازمین حج کے لیے اسپتالوں میں قائم کردہ ہنگامی مراکز میں 9935مریضوں کا معائنہ کیا گیا۔ عازمین حج کے لیے مدینہ منور اور مکہ مکرمہ میں ڈسپنسریوں میں معائنہ کرانے والوں کی تعداد 14126جب کہ بڑے مراکز میں 11994عازمین حج کی چیکنگ کی گئی۔حج کے موقع پر حجاج کرام کے ساتھ ساتھ 100چھوٹی ایمبولینسوں کا انتظام کیا گیا ہے جب کہ 80بڑی ایمبولینسیں بھی عازمین حج کے لیے مختص کی گئی ہیں جو کسی بھی ہنگامی صورت حال میں عازمین حج کی طبی مراکز تک رسائی میں مدد کریں گی۔ وزارت صحت کی جانب سے حج کے دوران 29ہزار اہلکار اور رضاکاروں کی خدمات حاصل کی گئی ہیں۔