عرب اتحادی طیاروں کی صنعاء کے ہوائی اڈے پر بم بمباری
تہران، 15نومبر (ایس او نیوز؍آئی این ایس انڈیا)سعودی قیادت میں عرب اتحادی طیاروں نے منگل کے روز یمن میں ایران نواز شیعہ حوثی باغیوں کے زیرقبضہ ہوائی اڈے پر بمباری کی۔ بتایا گیا ہے کہ دارالحکومت صنعاء کے ہوائی اڈے پر ہونے والی کارروائی کے نتیجے میں نقصان سے متعلق متضاد خبریں سامنے آ رہی ہیں۔ اقوام متحدہ کا کہنا ہے کہ اس حملے کے باوجود ہوائی اڈے کا بیشتر حصہ قابل استعمال ہے اور وہ امدادی طیاروں کے لیے استعمال کیا جاتا رہے گا۔ تاہم یمنی حکام کے مطابق اس حملے میں ہوائی اڈے کے رن وے اور نیوی گیشن ٹاور کو نقصان پہنچا ہے۔ سعودی قیادت میں عرب اتحاد مارچ 2015 سے یمن میں حوثی باغیوں کے خلاف عسکری کارروائیاں جاری رکھے ہوئے ہے۔