کاروار 28؍مئی (ایس او نیوز) ڈرائیونگ لائسنس کے حصول کو آسان بنانے اور ایجنٹوں کا وسیلہ روکنے کے لئے روڈ ٹرانسپورٹ ڈپارٹمنٹ نے یکم جون سے ریاست بھر میں نیا سافٹ ویئر ’سارتھی ۔4‘لانچ کرنے کا اعلان کیا ہے۔لیکن اس سافٹ ویئر کے ذریعے عام آدمی کوڈرائیونگ لائسنس کے لئے عرضی میں تھوڑی مشکل پیش آنے کا اندیشہ ظاہر کیا جارہا ہے۔

اس سے پہلے محکمہ روڈ ٹرانسپورٹ کی طرف سے لائسنس کی درخواستوں کے لئے ’سارتھی ۔3‘کا استعمال کیا جارہا تھا۔ اب اسے ’سارتھی ۔4‘سے بدلا جارہا ہے۔کہا جاتا ہے کہ کچھ عرصے قبل سے ہی اس سافٹ ویئر کو ریاست کے چند مقامات پر استعمال کیاجارہا تھا، اور اب ریاست میں پوری طرح اسی سافٹ ویئر کو استعمال کیا جائے گا۔ اس کے بعد آر ٹی او کے دفتر لائسنس کی درخواست دینے یا دستاویزات جمع کرنے کے لئے میں لمبی لمبی قطاروں میں کھڑے کی ضرورت باقی نہیں رہے گی۔ تاحال ’سارتھی ۔3‘کے ذریعے آن لائن درخواست دینے کے بعد اس کی نقل او ردستاویزات آر ٹی او دفتر میں جمع کروانا پڑتا تھا۔ اب اس مرحلے کو آسان بناتے ہوئے ’سارتھی ۔4‘میں درخواست کے علاوہ تمام ضروری دستاویزات اور درخواست گزار کے دستخط بھی اسکیان کرکے آن لائن جمع کیے جاسکیں گے۔پڑھے لکھے لوگوں کے لئے یہ طریقہ بہت ہی آسانی کا سبب ہوگا ،لیکن کم پڑھے لکھے اور آن لائن طریقے سے درخواست دینے کی معلومات نہ رکھنے والوں کے لئے اس سے تھوڑی مشکل پیش آسکتی ہے۔کیونکہ درخواست گزار کو تقریباً21سوالات کے جوابات دینے پڑتے ہیں۔تمام سوالات انگریزی زبان میں ہوتے ہیں۔

محکمہ نقل و حمل کے افسران کے مطابق آن لائن درخواستوں کا طریقہ آر ٹی او دفتروں کے کام کاج میں عوام اور افسران کے بیچ ایجنٹوں کا وسیلہ روکنے اور خواہشمندوں کو براہ راست ڈرائیونگ لائسنس فراہم کرنے کے مقصد سے متعارف کیا گیا ہے۔