نئی دہلی،19 فروری(ایس او نیوز؍آئی این ایس انڈیا)سپریم کورٹ نے مغربی بنگال کے چیف سکریٹری، پولیس ڈائریکٹر جنرل اور کولکاتہ کے پولیس کمشنر کو زاردا چٹ فنڈ کیس سے متعلق توہین کے معاملے میں ذاتی طور پر پیش ہونے کے بارے میں منگل کو کوئی حکم جاری نہ کرنے کا فیصلہ کیا۔چیف جسٹس رنجن گوگوئی، جسٹس ایل ناگیشور راؤ اور جسٹس سنجیو کھنہ کی بنچ نے کہا کہ اس معاملے پر بدھ کو سماعت کی جائے گی۔بنچ نے کہاکہ ہم کوئی حکم جاری نہیں کر رہے ہیں،ہم اس معاملے کو کل لیں گے۔ عدالت کے پانچ فروری کے حکم کے مطابق یہ معاملہ درج ہوا تھا کہ کیاریاست کے چیف سکریٹری مالائی کمار ڈے، پولیس ڈائریکٹر جنرل (ڈی جی پی) وریندر کمار اور کولکاتہ کے پولیس کمشنر راجیو کمار کو 20 فروری انفرادی طور پر پیش ہونے کا حکم دیا جائے یا نہیں۔کورٹ نے کہا تھا کہ وہ ان افسران کے حلف ناموں کے مشاہدے کے بعد ہی اس سلسلے میں فیصلہ لے گا۔عدالت نے پانچ فروری کو سی بی آئی کے الزامات پر ان افسران کو ہتک عزت نوٹس جاری کیا تھا۔تفتیشی بیورو کا الزام تھا کہ انہوں نے ایجنسی کے کام میں رکاوٹ ڈالی اور وہ شاردا چٹ فنڈ گھوٹالے سے متعلق معاملات کے الیکٹرانک ثبوت کے ساتھ چھیڑ چھاڑ کر رہے تھے،اگرچہ مغربی بنگال حکومت اور پولیس نے اپنے حلف ناموں میں سی بی آئی کے ان الزامات کو مسترد کیا کہ انہوں نے شاردا چٹ فنڈ گھوٹالے کی جانچ میں رکاوٹ ڈالی ہے۔ریاست کی پولیس نے کہا کہ مرکزی ایجنسی نے بغیر مناسب کاغذات کے تین فروری کو کولکاتہ کے پولیس کمشنر کی رہائش گاہ میں زبردستی داخل ہونے کی کوشش کی تھی۔